OÉ-CUSSE, 24 janeiru 2024 (TATOLI) – Diretór Programa Nasionál Dezenvolvimentu Suku (PNDS) Rejiaun Administrativa Espesiál Oé-Cusse Ambeno (RAEOA), João Bobo, informa, PNDS Oé-Cusse hetan alokasaun Orsamentu hosi nasionál hamutuk $930,141.55 hodi finansia programa 16 maioria ba infraestrutura bázika.
“Iha tinan ne’e ita prioridade programa 16 iha atu implementa ba suku 18, maioria ba infraestrutura bázika, ho totál alokasaun orsamentu mai PNDS Oé-Cusse hamutuk $823,141.55 ho nia operasionál hamutuk $107,000.00 ne’ebé totál hamutuk $930,141.55,” João Bobo, ko’alia iha Oé-Cusse, kuarta ne’e.
Nia informa, infraestrutura sira-ne’e maioria estrada rurál sira, bee-moos, ba setór edukasaun atu hadi’a moru haleu eskola, no manutensaun ba eskola balun, maibé maioria iha tinan ne’e ba reabilitasaun estrada rurál de’it.
“Projetu hirak-ne’e atu implementa bazea matadalan PNDS rasik, prioridade sira-ne’e hahú hosi nível aldeia mai to’o suku, lori ba sekretariadu munisípiu, kontinua lori ba akonsellu konsultivu munisipiu depois lori ba sekretáriadu PNDS nasionál, kontinua lori ba ministru hodi hetan aprovasaun, signifika prioridade mai hosi komunidade rasik,” nia katak.
Nia hateten, ajenda ba implementasaun, daudaun ne’e senssiliza ona iha nível munisípiu, depois sei kontinua hala’o tán iha nível suku, hodi prepara implementasaun ba programa sira-ne’ebé sai prioridade iha suku.
Tuir nia, iha tinan 2024 ne’e Governu anunsia ona, sei laiha ona Uma Naroman Povu, nune’e ekipa PNDS munisípiu sei foka liu ba programa PNDS regulár.
Notísia relevante: MAE sensibiliza matadalan ezekusaun projetu PNDS 2024 iha Oé-Cusse
Jornalista : Abílio Elo Nini
Editór : Evaristo Soares Martins
