MAE sensibiliza matadalan ezekusaun projetu PNDS 2024 iha Oé-Cusse
OÉ-CUSSE, 23 janeiru 2024 (TATOLI) – Ministériu Administrasaun Estatál (MAE) tersa ne’e hala’o sensibilizasaun kona-bá implementasaun projetu Programa Nasionál Dezenvolvimentu Suku (PNDS) 2024 ba autoridade lokál no Ekipa Jestaun Suku (EJS) suku 18 iha Rejiaun Administrativa Espesiál Oé-Cusse Ambeno (RAEO).
Notísia relevante: Xefe suku sira husu Parlamentu Nasionál fiskaliza ezekusaun PNDS iha Oé-Cusse
Reprezentante Sekretária Ezekutiva PNDS, Dulce de Jesus Juniór, hateten, sensibilizasaun ne’e, hanesan atividade regulár PNDS nian, realiza kada tinan ho objetivu atu transmite informasaun detalla molok tama iha faze implementasaun projetu no ezekusaun orsamentu 2024 nian.
“Ohin ita hamutuk iha-ne’e, tanba estrutura suku sira balu foun, tán ne’e antes atu hahú programa PNDS regulár iha 2024, ita presiza mós halo sensibilizasaun, nune’e ita hotu ho hanoin ida, kona-bá matadalan PNDS, lei sira no mós prosedimentu hotu, ne’ebé PNDS uza atu implementa PNDS regulár no Uma Kbiit Laek nian,” Dulce de Jesus Juniór, ko’alia iha sensibilizasaun ne’ebé realiza iha otel Ambeno.
Nia informa, IX Governu Konstitusionál iha komitmentu nafatin kontinua osan iha 2024, tantu iha 2023 orsamentu aloka ona iha konta bankária suku sira iha fulan-novembru 2023, hosi orsamentu retifikativu hamutuk millaun $19, tranfere ona ba iha suku 142 iha munisípiu hotu inklui RAEOA.
Nune’e iha 2024 nian, aloka ona hamutuk millaun $23, hein de’it atu aloka ba konta bankária suku sira, kuandu xefe suku sira selebra ona asina akordu Prezidente Autoridade atubele aloka ona orsamentu ba suku 18 iha Oé-Cusse.
“Tán ne’e maka sensibilizaun importante atu ita-boot sira intende didi’ak matadalan programa PNDS, ita-boot sita iha direitu atu kontrola no prosesa, entaun imi tenke hatene imi-nia papél maka saida, nune’e iha futuru implementasaun labele enfrenta problema iha ezekusaun,” nia fó hanoin.
Sekretáriu Rejionál Sesante ba Asuntu Administrasaun, Martinho Abani Elo, konsidera sensibilizasaun ne’e importante ba autoridade lokál sira atu rona esplikasaun, lala’ok no matadalan, hodi intende kompeténsia autoridade suku sira-ne’e iha parte ne’ebé.
“Tanba imi maka hamutuk ho komunidade iha baze, imi mak sei eskolla prioridadae saida mak presiza halo iha imi-nia suku, entaun ohin ne’e importante ba xefe suku sira atu hatene, tanba ne’e liga direita ba infraestrura atu halo iha suku no aldeia sira,” nia informa.
Notísia relevante: MAE-RAEOA selebra MoU reforsa implementasaun PNDS Oé-Cusse
Entretantu, hola parte iha sensibilizasaun ne’e, maihosi diretór no xefe departamentu sira, sosiedade sivíl, Ekipa Jestaun Suku no Konsellu Suku 18 iha territóriu Oé-Cusse.
Jornalista: Abílio Elo Nini
Editór: Evaristo Soares Martins
