iklan

EKONOMIA, HEADLINE, MUNISÍPIU, OÉ-CUSSE (RAEOA), POLÍTIKA

Xefe suku sira husu Parlamentu Nasionál fiskaliza ezekusaun PNDS iha Oé-Cusse

Xefe suku sira husu Parlamentu Nasionál fiskaliza ezekusaun PNDS iha Oé-Cusse

Xefe suku Usitaqueno, Jose Elo. Imajen Tatoli/Abilio Elo Nini.

OÉ-CUSSE, 15 setembru 2023 (TATOLI – Xefe suku sira iha Rejiaun Administrativa Espesiál Oé-Cusse Ambeno (RAEOA), husu Parlamentu Nasionál (PN) atu halo fiskalizasaun ba ezekusaun Programa Nasionál Dezenvolvimentu Suku (PND) iha Oé-Cusse Ambeno.

Xefe suku sira hato’o sujetsaun sira-ne’e, bainhira hala’o enkontru ho membru Parlamentu Nasionál liuhosi komisaun C, trata asuntu kona-bá Finansa Públika, iha salaun administrasaun Oé-Cusse, kinta ne’e.

“Programa PNDS ne’e to’o duni ami-nia suku, maibé buat hotu iha Ekipa Jestaun Suku (EJS) mak jere, iha nia matadalan, hatudu programa ne’e ba suku, maibé ami nu’udar membru autoridade lokál akompaña de’it, se projetu sira la’o laloos ami lahetene tuir, maibé nia afeta ne’e direita bas uku no kuminidade sira,” Xefe suku Usitaqueno,  hosi sub-rejiaun Oésilo, José Elo hateten.

tuir nia, dalaruma, projetu balu halo la hotu, no balu seidauk to’o tinan aat fila-fali ona, depois komunidade mak dún fali xefe suku, tan ne’e liuhosi oportunidade ne’e, husu ba Parlamentu Nasionál liuhosi komisaun C, sei bele halo fiskalizasaun, liuliu programa PNDS iha Oé-Cusse.

Notisia relevante: Autoridade Bobokase-Cunha husu PNDS aselera projetu perfurasaun bee-moos

Xefe aldeia Citrana hosi suku Bene-Ufe, sub-rejiaun Nítibe, Flaviano Falo, husu klarifikasaun liuliu ba PN, tanba  suku Bene-Ufe, kompañia ida, kada tinan nia mak implementa projetu PNDS iha suku, tantu bee-moos estrada no UNP.

Xefe aldeia Citrana, suku Bene-Ufe, Flaviano Falo. Imajen Tatoli/Abílio Elo. Nini.

Tuir nia, iha suku Bene-Ufe kompañia barak, maibé labele fó ema seluk, só kompañia ida de’it maka kada tinan nia mesak mak ezekuta programa PNDS iha suku Bene-Ufe liuliu iha parte Citrana nian.

“Mumentu UKL iha 2021 nia mesak mak hetan, foin daudaun UNP 2022 mós nia mak hetan, ba projetu sira seluk mós nia mak hetan, maibé iha suku laran kompañia barak, tán ne’e ami husu ba PN presiza fiskaliza nune’e ita-bele hatene, tanba saida, liuhosi tenderizasaun ka koutasaun, mak nia mesak de’it, kada tinan,” nia propoin.

Iha sorin seluk, xefe suku Taiboko, hosi sub-rejiaun Pante Makasar, Joaquim Tafin, reprezenta komunidade suku Taiboko, agradese ba prezensa PNDS, ne’ebé durante ne’e hala’o iha suku tanba ho prezensa programa nasionál ne’e, bele hadi’a netik prioridade komunidade sira-nian iha suku no aldeia.

Xef suku Taiboko, Joaquim Tafin. Imajen Tatoli/Abílio Elo Nini.

“Maibé ha’u husu tanba bainhira komunidade sira propoin atu halo bee-moos, ekipa PNDS mós konsidera no responde duni, tanba komunidade iha suku Taiboko, maioria hela iha leten maibé bee iha okos fali, dalaruma proposta sira ami propoin iha suku, mai to’o PNDS la konsidera, maske ida-ne’e prioridade bas uku ne’e rasik,” nia husu.

“Ami-nia sujesatun mós sei bele ba futuru tau mós osan ba manutensaun, tanba bainhira ekipamentu ida aat, hanesan bee-moos ita husik de’it, tanba laiha osan manutensaun, ida-ne’e defísil tebes sé mak atu toma responsabilidade atu hadi’a, tanba presiza mós osan ho montante boot hanesan bomba bee nian,” nia propoin.

Tuir nia, benefisiáriu sira kada fulan kontribui kada uma-kain fó sentavu $0,25, maibé montante ne’e la sufisiénte atu hadi’a sasán sira-ne’ebé avaria tanba presiza montante boot, entaun husu iha futuru bele tau osan manutensaun, no presiza fiskaliza projetu sira liuliu iha baze.

Tan ne’e liuhosi enkontru ofisiál ne’e, sujere ba Parlamentu Nasionál, kada trimestre ka tinan sei bele tun mai Oé-Cusse hodi fiskaliza netik nia implementasaun ne’e, atu susesu kala’e, tanba ami mós ladún hatene, obra barak mak dalaruma la dura.

Xefe suku Lela-Ufe hosi sub-rejiaun Nítibe, José Neno Sila, esplika, rograma PNDS regular, ezemplu, harii estrada loke ba aldeia no bairru sira, maibé estrada sira-ne’e halo hotu laiha bee-dalan, udan mai estraga tiga, depois iha mós bee-moos, maibé halo hotu tinan ida ka rua nia bomba bee ne’e aat tiha, depois laiha atu hadi’a husik hanesan ne’e de’it,  tanba ne’e ami husu ita-bele tau osan ba manutensaun.

Notísia relevante: PA RAEOA sujere ekipa PNDS konstrui infraestrutura bázika ho kualidade

Hatan ba sujestaun hirak-ne’e, Vise-Prezidente Komisaun C, Aliança da Conceição Araújo, esplika, jesatun ne’e loloos, konsellu suku mak implementa maibé iha akompañamentu hosi ekipa PNDS hosi nasionál, ida-ne’e nia intensaun atu haburas ekonómia iha suku nia laran.

“Loloos autoridade lokál iha suku mak implementa projetu PNDS, depois osan kuandu la hotu, osan ne’e fila-fali ba kofre suku hodi uza manutensaun ba projetu sira-ne’e,” nia katak.

Hanesan hosi suku Bene-Ufe, kada tinan ema ida-ne’e mak okupa hotu implementasaun projetu PNDS iha suku ida nia laran.

“Ida ne’e mós laloos, karik durante ne’e seidauk hetan fiskalizasaun hosi komisaun A karik, maibé ami hosi komisaun C sei koordena sira, atu marka tempu oinsá sira bele tun fila-fali mai Oé-Cusse, atu fiskaliza no haree mós matadalan PNDS nian,” nia katak.

Notísia relevante:MAE-RAEOA selebra MoU reforsa implementasaun PNDS Oé-Cusse

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!