OEKUSI, 07 Jullu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) hamutuk ho ekipa husi Rotary Club, inaugura projetu filtrasaun bee-moos faze dahuluk ba eskola neen. Inaugurasaun ne’e hala’o iha Eskola Tékniku Vokasionál (ETV) Palaban, iha suku Costa, sub-rejiaun Pante Makasar.
Prezidente Autoridade RAEOA, Régio da Cruz Salu, hateten katak estrutura RAEOA iha devér boot atu buka tulun hodi hadi’a kualidade moris komunidade nian, liliu iha setór edukasaun, saúde, no ba estudante sira-nia moris saudavél.
“Operasaun ne’e importante ho apoia ida-ne’ebé karitavél tebtebes, tinan kotuk Governu ko’alia katak, iha loron ida, hahú investe iha kualidade bee-moos iha área urbana ne’e atu labele nono, maibé tau iha torneira hemu de’it, maibé agradese bo’ot ba ekipa Rotary Club, bele apoia tebes polítika alvu ba eksola sira,” nia hateten iha ámbitu inaugurasaun iha eksola ETV Palaban.
Notísia relevante:Autoridade selebra akordu ho ekipa Rotary Club atu instala filtra bee-moos iha Oekusi
Impaktu no responsabilidade ba sustentabilidade
Iha fatin hanesan, Diretór Serbisu Rejionál Edukasaun Oekusi, Vincêncio Cono, la mensiona eskola neen ne’ebé asesu ona fasilidade foun ne’e, maibé nia hato’o agradesimentu no husu ba dirijente eskola sira atu kuida instalasaun ne’e ho responsabilidade boot.
“Ita agradese ba Rotary Club, sira-nia tulun ohin ita hamutuk iha fatin ne’e. Ita uza liafuan give and take (sira fó ita simu), no take and give (ita foti no tenke fó), atu fó saida, ita-nia responsabilidade ba buat ne’ebé maka sira entrega mai ita, grasa boot ida la’ós ita maka halo, maibé ho fuan no laran, sira bele tulun ita. Eskola neen ne’ebé instala ohin halo inaugurasaun maioria iha área urbana, ne’e sai matan dalan no sai baze fundamentál sei lori ita ba iha prosesu sira tuirmai,” nia hateten.
Vincêncio Cono mós apela ba estudante no manorin (profesór) sira atu tau matan didi’ak ba “oferesimentu domin” ne’e, no fó apresiasaun aas ba Prezidente Autoridade RAEOA tanba liuhusi selebrasaun akordu (MoU) ho Rotary Club bele lori benefísiu ba eskola no komunidade sira iha Oekusi.
Planu alargamentu faze tuirmai
Koordenadór ekipa Rotary Club, Adrino Maria de Jesus, deklara katak eskola neen ne’ebé hetan instalasaun ne’e foin mós ba faze dahuluk. Ba oin, sira iha ona planu atu kobre mós área rurál sira:
- Faze 1 (Atuál): Eskola neen (maioria iha área urbana).
- Faze 2 (Planu): Eskola sanolu tan (depende ba eskola ne’ebé iha ona asesu ba bee-matan, tanba Rotary Club apoia de’it ba parte instalasaun filtru).
“Ami halo ona instalasaun filtru bee-moos iha 52 iha territóriu nasionál, durante hala’o asesmentu hodi buka fatin ba instasalaun problema ne’ebé enfrenta maka profesór balun, rejeita maibé espera labele akontese iha Oekusi, tanba importante liu ba estudante sira, tanba ne’e espera estudante sira bele utiliza didi’ak ba, tanba apoia ne’e ho fuan no domin ba alin estudante sira iha Oekusi, ne’ebé ba oin ita sei kobre to’o área rurál sira liliu eskola, fasilidade saúde inklui komunidade sira,” nia informa.
Entretantu, estabelesimentu ensinu neen ne’ebé mak sai benefisiáriu maka:
- Ensinu Báziku Filiál (EBF) 1,2,3 Mahata;
- Ensinu Báziku Sentrál 3 Siklu Palaban;
- Ensinu Báziku Filiál (EBF) 1,2 30 Agostu Masin;
- Ensinu Báziku Sentrál (EBC) 3o Siklu Tulaica Aenmat;
- Ensinu Báziku Sentrál 3o Siklu Boboloa; inklui,
- Ensinu Sekundáriu Téknika Vokasionál (ESTV) Palaban;
Jornalista: Abílio Elo Nini
Editór: Rafael Ximenes de A. Belo
