DILI, 08 Jullu 2026 (TATOLI) – Ministru Planeamentu no Investimentu Estratéjiku, Gastão de Sousa, no Reprezentante Banku Mundiál iha Timor-Leste, David Freedman, husu ba Ajénsia Notisioza Timor-Leste Tatoli, I.P tenke sai ajénsia notisioza ne’ebé kredivel, imparsiál no profisionál iha publikasaun informasaun sira.
Mensajen ida-ne’e hato’o iha selebrasaun aniversáriu Tatoli ba da-X (27 Jullu 2016-27 Jullu 2027), ne’ebé konsidera importante atu reforsa papél Ajénsia Notisioza Estadu nian hanesan fonte informasaun ofisiál ba Timor-Leste.
“Parabéns ba TATOLI. Ha’u husu nafatin sai ajénsia ne’ebé eziste tuir duni papél ajénsia nian, liuliu la’o tuir misaun no vizaun ne’ebé iha. Durante iha publikasaun notisía sira ita haree di’ak ona, maibé presiza hadi’ak liután”, Gastão de Sousa hateten ohin.
Iha sorin seluk, Reprezentante Banku Mundiál iha Timor-Leste, David Freedman, hato’o parabéns ba família boot Tatoli ba ninia aniversáriu ba da-X no apresia kontribuisaun ajénsia ne’e ba dezenvolvimentu nasaun.
“Ami haree katak ita boot sira-nia knaar ba dezenvolvimentu iha Timor-Leste ne’e importante tebes, tanba nu’udar fonte mídia ofisiál ba Timor-Leste. Dezeju susesu nafatin, husu fó atensaun hatutan lia-loos ba povu Timor-Leste no ba rai-li’ur”, nia dehan.
Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, salienta durante ezisténsia Tatoli, observa katak ajénsia ne’e konsege habelar informasaun ne’ebé kredivel tuir saida mak akontese.
“Ami husu Tatoli nafatin atu hamrik hanesan mídia ne’ebé independente hodi hato’o informasun ne’ebé loos tuir Tatoli nia vizaun no misaun rasik. Ami rekomenda katak tenke mantein profesionalizmu hodi hato’o informasaun ne’ebé loos”, nia hato’o.
Notísia relevante: Hugo Fernandes: “TATOLI nia ezisténsia ba da-X ha’u seidauk haree define nia alvu”
Jornalista: Arminda Fonseca
Editora: Maria Auxiliadora
