BAUKAU, 08 Jullu 2026 (TATOLI)—Ofisiál Komisaun Nasionál Eleisaun (CNE-sigla portugeza) hamutuk na’in-ualu sei superviziona serbisu Sekretariadu Tékniku Administrasaun Eleitorál (STAE) iha kada postu administrativu iha Munisípiu Baukau.
Diretór CNE Munisípiu Baukau, Esmeraldo Damião Belo, esplika hafoin ramata rekruta no partisipa formasaun, ofisiál supervizaun na’in-ualu sei koloka ba kada postu administrativu iha-ne’ebé sei observa serbisu tratamentu kartaun biométriku ne’ebé atualmente hahú realiza iha postu administrativu sira.
“Sira-ne’e atu superviziona operadór sistema sira husi STAE nian ne’ebé mak hala’o nia kna’ar iha nivel postu,” Esmeraldo dehan ba TATOLI iha nia kna’ar fatin, Vila Nova, Baukau, Kuarta ne’e.
Esmeraldo Belo relata prezensa ofisiál nian atu monitoriza serbisu STAE nian no enkoraja sidadaun idade 17 ba leten atu partisipa másima iha prosesu tomak tanba atu atualiza dadus eleitór sira.
Antes ne’e pesoál na’in-ualu aprende matéria sira mak hanesan prosesu inísiu rejistu ba eleitór foun no tuan sira iha-ne’ebé atu atualiza kartaun eleitorál husi semi ba biométriku iha Munisípiu Baukau.
Nune’e, CNE Baukau sei superviziona serbisu STAE to’o ramata bazeia ba oráriu relasiona ho atividade resensiamentu eleitór biométriku nu’udár parte preparasaun hodi realiza eleisaun tolu hanesan Eleisaun Prezidensiál no Munisipál iha tinan 2027 no Parlamentár iha 2028.
“Supervizaun inportante, tanba eleisaun sira-ne’ebé mai ita presza dadus akuradu,” Esmeraldo subliña.
Entretantu, ofisiál supervizaun CNE Baukau hamutuk na’in-ualu kompostu husi feto rua no mane na’in-neen ne’ebé koloka postu administrativu ualu hanesan Baguia, Baukau Vila, Laga, Kelikai, Kelikai Antigu, Matebian, Venilale no Vemasse.
Jornalista: Natalino Belo
Editór: Xisto Freitas da Piedade
