DILI, 10 Jullu 2026 (TATOLI) – Abertura Liga Nasionál Basketeból Timor-Leste (LNBTL) realiza ona iha sesta-feira ne’e, hafoin paradu durante tinan sanulu. Liga ida-ne’e lidera husi Madalena Pereira Carlos, ne’ebé sai hanesan feto dahuluk hetan konfiansa husi Feerasaun Nasionál Basketból Timor-Leste atu kaer Prezidénsia Liga Basketeból Timor-Leste.
Maski okupadu ho responsabilidade hanesan Vise-Prezidente ba Asuntu Administrasaun no Finansa iha Ajénsia Notisioza Timor-Leste Tatoli, Madalena nafatin fahe nia tempu hodi jere liga ne’e no fó kontribuisaun ba dezenvolvimentu basketeból iha rai-laran.
Abertura liga ne’e iha Jináziu Dili realiza husi Governu, liuhusi Ministériu Juventude Desportu Arte no Kultura (MJDAK) hamutuk ho Federasaun Basketeból Timor-Leste.
Iha okaziaun ne’e, Ministru Juventude, Desportu, Arte no Kultura, Nelyo Isaac Sarmento, hateten katak reativasaun liga ne’e responde ba adeptu no atleta sira ne’ebé hein tempu naruk atu haree kompetisaun nasionál ne’e moris filafali.
“Ha’u husu ba imi, mai kompete la’ós de’it atu sai kampiaun, maibé atu joga ho di’ak, lori labarik sira gosta basketeból”, Nelyo hateten iha nia diskursu ba abertura Liga Basketeból Timor-Leste.
Governante ne’e husu ba atleta sira kompete ho disiplina no respeitu, tanba desportu halo ema hamutuk, kria amizade no fahe esperiénsia, maski klubu no tátika jogu lahanesan.
“Parabéns ba atleta sira hotu. Ami iha ne’e hakarak haree imi-nia jeitu jogu, esforsu atu sai kampiaun ba liga dahuluk ida-ne’e”, Nelyo hato’o.
Iha fatin hanesan, Prezidente Federasaun Basketból Timor-Leste, Joaquim Martins, konsidera abertura liga ne’e hanesan loron istóriku ba familía Basketeból Timor-Leste.
“Ita hotu hamutuk iha ne’e sai sasin ba moris hias modalidade basketeból ne’ebé tempu naruk hein hela atu moris filafali. Tempu naruk la realiza liga, maibé agora hahú fali ho esperansa foun, liuliu ba ita-nia atleta sira”, Joaquim hateten.
Nia mós husu ba atleta sira aproveita oportunidade ne’e, la’ós atu hetan de’it vitória, maibé atu hatudu talentu, disipilna no karáter. Nia sujere atu iha jogu ne’e buka iha respeita ba malu, onestidade no responsabilidade.
“Basketeból la’ós de’it kona-ba pontu ou kampiaun. Basketeból hanorin ita atu respeita malu, hanorin ita atu serbisu hamutuk, hanorin ita atu lidera, atu foti desizaun lalais, atu simu derrota ho dignidade no hanorin mós ita atu manán ho dignidade”, nia dehan.
Prezidente Liga Basketeból Timor-Leste, Madalena Pereira Carlos, husu ba atleta hotu atu joga ho pauxaun no fuan tomak. “Ida-ne’e ita hamriik filafali, joga ho paixaun ba, depois tinan sanulu para tiha. Ami esforsu no halo moris filafali liga ne’e”, nia afirma.
LNBTL hetan apoiu orsamentu husi Governu ho montante hamutuk rihun $300. Kompetisaun ne’e envolve klubu 24, kompostu husi mane 12 no feto 12 ne’ebé antes ne’e eziste ona.
Kompetisaun ne’e realiza iha fulan-Jullu to’o Dezembru 2026, ho jogu sira hala’o kada semana dala-rua, iha sábadu no domingu.
Premiu ba manán-na’in sira mak primeiru lugar rihun $20, segundu $15, terseiru $10. Enkuantu ba kuartu lugar sei responsabiliza husi organizadór liga
Iha jogu abertura ne’e, klube Santo António kontra Ponta Leste. Vitória ba jogu ne’e monu ba Ponta Leste ho pontu 74 no Santo António 52.
Jornalista: Hortêncio Sanchez
Editora: Maria Auxiliadora
