DILI, 16 Jullu 2026 (TATOLI)—Diretór Ezekutivu Servisu Migrasaun, Komisáriu Asistente Polísia Jorge Monteiro, admite katak pesoál migrasaun fa’an duni vistu stiker ba sidadaun estranjeiru sira ne’ebé hakarak tama iha territóriu Timor-Leste.
“Iha oportunidade ne’e ha’u hakarak hateten katak, sim vistu stiker ne’e fa’an duni. Vistu stiker ne’e la gratuita. Vistu stiker ne’e fa’an ba estranjeiru sira ne’ebé neseita vistu sira ne’ebé aplika iha territóriu nasionál Timor-Leste,” Komisáriu Asistente Polísia Jorge Monteiro hateten liuhusi konferénsia impresa ne’ebé halo iha Ministériu Interiór, Vila-Verde, Kinta ne’e.
Diretór hato’o asuntu ne’e relasiona ho informasaun sira ne’ebé espalla iha media elektrónika no rede sosiál, katak pesoál sira ne’ebé serbisu iha Servisu Migrasaun espesialmente iha parte atendimetu ne’e fa’an vistu stiker ba sidadaun estranjeiru sira.
“Klaru vistu ne’e fa’an, vistu ne’e la fó gratuita, vistu sira ne’ebé fa’an ne’e vistu ba ema estranjeiru sira. La’ós fa’an de’it ba estranjeiru maibé ba mós kompañia nasionál no internasionál sira. Kompañia nasionál sira iha rai-laran ne’e mak neseita péritu ruma, ema ruma mai serbisu iha sira-nia kompañia hodi halo serbisu nesesita vistu traballu ami fa’an ba sira,” nia akresenta.
Diretór hatutan, karik iha kompañia internasionál ruma ne’ebé tama mai iha territóriu nasionál hodi responsável ba projetu ruma no nia haruka traballadór mai serbisu mai iha kompañia ne’e nia presiza vistu traballu ou vistu rezidénsia ne’e parte Servisu Migrasaun bele fasilita (fa’an).
“Vistu ne’e fa’an, la gratuita tanba Lei Migrasaun Aziliu artigu 128 no 129 iha tabela ida no tabela rua ne’e hateten no haruka katak vistu sira iha Servisu Migrasaun ne’e ami fa’an, ne’ebé vistu sira ne’e ami fa’an duni. Faan vistu ne’e tuir iha sistema ne’ebé iha,” nia katak.
Notísia relevante : Servisu Migrasaun klarifika xineza na’in-44 ne’ebé hetan identifikasaun iha Aileu
Karik presiza vistu traballu pressiza kompleta dokumentu no halo pagamentu iha banku ne’ebé Governu determina ona.
“Ita-boot fila mai depois ami taka vistu ba ita-nia nia pasaporte tuir vistu ne’ebé ita-boot selu tuir vistu ne’ebé sosa. Klaru vistu sira ne’ebé Servisu Migrasaun fa’an. Vistu turizmu $30 ba sidadaun estranjeiru hotu, eseptu sidadaun Indonézia ita la fa’an,” nia tenik.
Diretór esplika, vistu tránzitu estranjeiru iha Aeroportu Timor ho folin $20, vistu entrada temporáriu $50, vistu rezidénsia $50, vistu halo negósiu iha rai-laran $100, vistu negósiu ba klase 2 ho folin $150 no vistu traballu ba sidadaun estranjeiru ne’ebé mai serbisu iha territóriu nasionál $100.
“Vistu ne’e elektróniku no nia tenke liuhusi prosedimentu, primeiru ita tenke ser submete dokumentu ne’ebé verifika no kompletu depois ita hasai foto no rekezitu biométriku sira. Ita simu resivu bá selu iha banku depois ta aprezenta iha Servisu Migrasaun ne’e sira bele print vistu ne’e iha sistema hodi bele taka ba pasaporte,” nia hato’o.
Diretór ne’e reforsa, karik entidade balun iha buat ruma husi atendimentu Servisu Imigrasaun mak ladún la’o di’ak, bele hato’o keixa ba parte relevante inklui evidénsia sira.
“Vistu sticker ne’ebé pasaporte nia diferente ho pasaporte, se pasaporte ne’e manuel ohin ne’e ema fó lima ita bele tau ida iha gaveta, kuandu ema nesesita urjente ita bele fasilita. Ita-boot nia osan lakon de’it tanba bainhira la priexe rekezitus vistu ne’e ha’u print la sai, ne’ebé ha’u mós simu ita-boot nia osan saugati tanba vistu ne’e elektróniku, ita-boot tenke ser priense rekezitus sira ne’e hotu mak ita foin print sai taka iha pasaporte,” nia katak.
Jornalista : Natalino Costa
Editora : Julia Chatarina
