DILI, 07 janeiru 2020 (TATOLI)-Prezidente Komisaun F Parlamentu Nasionál ne’ebé trata asuntu saúde, Maria Barreto hateten, Orsamentu ba tinan-2020 husi Ministériu Saúde (MS) nian sei redusaun ba iha kategoria bens no servisu.
Tanba orsamentu miliaun rua ne’e apoiu husi parseiru dezenvolvimentu, Uniaun Europeia no orsamentu ne’e bele lori ba iha Parlamentu Nasionál (PN) maibé fundu ne’e tama iha apoiu dezenvolvimentu nasionál nian.
“Orsamentu ne’ebé apoiu husi Uniaun Europeia ne’e labele tau hamutuk iha proposta Orsamentu Jerál Estadu tinan-2020 nian maibé ita presiza halo separasaun ba apoiu ne’ebé mak iha,” dehan Prezidente Komisaun F ba media sira, iha Parlamentu Nasionál, ohin.
Maria Barreto informa ,orsamentu husi MS nia mak proposta dahuluk ne’ebé mak retira husi Primeiru-Ministru depois governu halo reformulasaun ba iha ba OJE (Orsamentu Jerál Estadu) 2020 nian.
Bazeia ba proposta ne’ebé mak Governu submete mai iha PN husi MS ninia ho montante bazeia ba proposta millaun $59.
Maibé depois audiénsia husi Komisaun F ne’e rasik halo diskusaun, estuda kle’an no identifika fallansu uitoan ne’ebé akontese iha MS nian mak fallansu dahuluk hanesan iha millaun rua ne’ebé apoiu husi parseiru dezenvolvimentu Uniaun Europea nian ne’ebé aloka ba iha proposta ne’e.
“Maibé ida ne’e ami konsidera katak sei iha redusaun fali ba orsamentu husi Ministériu Saúde nian tanba ne’e mak bazeia husi redusaun finál ne’ebé mak husi Ministériu Saúde rasik iha mak ho montante 56 millaun ne’ebé mak aloka ba iha tinan-2020 nian,” haklaken Prezidente Komisaun F, Maria Barreto.
Notísia relevante:MS Redús Orsamentu Millaun Tolu Iha OJE 2020
Jornalista : Felicidade Ximenes
Editór : Rafy Belo
