DILI, 12 Dezembru 2025 (TATOLI)—Diretór Diresaun Nasionál Infraestrutura no Komunikasaun, Ambrosio Amaral, informa ajénsia Estadu hamutuk 600-resin mak daudaun ne’e sira halo ona konesau baliña internet uza fibra ótika (kabu submarinu).
Notísia Relevante: MTK no CTL, E.P lansa “try out” koneksaun fibra ótika ba liña Governu
“Hafoin Governu halo lansamentu trial ba kabu submarinu iha fulan kotuk liubá, entaun ami kontinua kedas halo ligasaun ba dadus sentrál (Data center) DNIK nian iha edifísiu Kaikoli,” Diretór Nasionál ne’e relata ba Agência Tatoli liuhusi telefónika, ohin.
Hahú husi 01 Dezembru liubá, ami halo ona konesaun internet husi kabu submarinu ba ajénsia hamutuk 600 mak konekta ona rede NCP (Network Control Program) liuhusi DNIK iha territóriu laran tomak.
Iha biban ne’e, nia mós hatutan, iha liña ministeriál sira barak liu mak asesu hotu ona fibra ótika, maske iha ida ka rua mak seidauk, nune’e sira hein halo koordenasaun ho ekipa téknika atu bele halo konesaun internet foun ida-ne’e.
“Polítika ida-ne’e la’ós atu hamate operadór sira seluk maibé oinsá atu garante seguransa dadus instituisaun ida-nian liuliu hanesan Ministériu Finansa, tanba ne’e di’ak-liu uza liña internet Governu nian atu ami bele halo kontrolu ho di’ak liután,” nia esplika.
Antes ne’e, iha reuniaun Konsellu Ministru, kuarta ne’e, Ministru Transporte Komunikasaun, Miguel Gonçalves Manetelu, hateten fibra ótika foin daudaun lansa ne’e sira halo trial uluk ba instituisaun Governu sira hodi haree ninia kapasidade no velosidade asesu husi liña internet ida-ne’e.
“Enkuantu instituisaun Governu balun mak seidauk asesu ba liña internet foun ne’e husi sira-nia téknika atu haree hodi tesi kotu ona operadór internet tuan nian atu uza fali fibra ótika,” Ministru ne’e dehan.
Jornalista : Alexandra da Costa
Editór : Cancio Ximenes
