DILI, 22 Marsu 2024 (TATOLI) – Antigu alunu Arava International Center for Agricultural Training hamutuk 374 ne’ebé hetan ona formasaun adekuada iha Izraél, entre 2015 no 2022, 40% maka kria ona empregu hodi fó serbisu ba ema seluk iha setór ortikultura, informa Diretór Nasionál Rekursu Umanu no Jurídiku, Ministériu Agrikultura, Pekuária, Peska no Floresta (MAPPF), Hipólito da Costa.
”Programa ne’e implementa atu ajuda foinsa’e timoroan sira hodi dezenvolve agrikultura ho profisionál. Programa ne’e MAPPF serbisu hamutuk ho AICAT dezde 2015 no ita haruka ona estudante hamutuk 374 husi instituisaun oioin ho objetivu atu estuda siénsia agríkola moderna iha Izraél atu aplika iha Timor-Leste”, Hipóllito da Costa hatete iha Comoro, ohin.
Dirijente ne’e esplika katak husi programa AICAT ne’ebé foku ba dezenvolvimentu moris juventude nian ne’e lori mós orgullu ba MAPPF tanba matenek ne’ebé sira hetan iha Izraél, balun kria ona grupu hodi fó fali serbisu ba ema seluk. “Purezemplu, iha Viqueque-Raitahu, Liquiçá, Ataúro, no balun apoiu mós grupu agrikultór sira seluk hodi kuda modo”, dehan.
Rekorde katak, iha Setembru 2023, Ministériu Agrikultura haruka ona estudante 50 ba partisipa fomasaun kona-ba agrikultura moderna iha Izraél. Formasaun sei hala’o durante fulan 11 nia laran no sei finaliza iha Jullu 2024. “Espera katak bainhira sira fila mai bele loke tan postu traballu ba timoroan sira, nune’e bele tulun sira nu’udar toos-na’in”, realsa.
Prosesu haruka estudante timoroan bá Izraél ne’e hetan kolaborasaun ho universidade no eskola agrikultura sira iha país hodi halo selesaun mak hanesan Universidade Nasionál Timor Lorosa’e, Universidade Oriental Timor Lorosa’e, Universidade da Paz, Institutu Politékniku Betano, Institutu Kafé Akadémiku Ermera, Fakuldade Agrikultura Natarbora, Eskola Agrikultura Maliana, Fuiluro no Oé-Cusse atu hili estudante sira ne’ebé elejivel hodi partisipa iha programa AICAT iha Izraél.
“Prosesu selesaun ne’e hala’o husi universidade no instituisaun sira, nomós MAPPF responsavel ba dokumentu administrativu sira”, dehan.
Programa AICAT ne’e importante tebes tanba benefisiáriu balun implementa ona abilidade no koñesimentu agríkola modernu hodi apoia agrikultór sira iha Timor-Leste. Sentru AICAT mak formasaun servisu agrikultura modernu ida ne’ebé hala’o iha Izraél no kuaze nasaun 14, inklui Timor-Leste maka partisipa ona iha programa ne’e.
Sentru formasaun ne’e kria iha Sapir iha 1994 ne’ebé hetan apoia husi Ministériu Negósiu Estranjeiru no Ministériu Agrikultura Izraél. Sentru ne’e forma, kada tinan, estudante liu rihun husi nasaun sira Áfrika no Ázia.
Notísia relevante: Antigu alunu AICAT na’in-lima mantein serbisu voluntáriu iha sentru agro-komérsiu Raitahu
Jornalista: Tomé Amado
Editora: Maria Auxiliadora
