DILI, 26 outubru 2022 (TATOLI)— Komandante Jerál Polisia Nasionál Timor-Leste (PNTL), Komisáriu Faustino da Costa, nomeia hikas Superintendente Xefe Arnaldo de Araújo, hodi asume hikas kargu nu’udar Xefe Departementu Relasaun Públiku PNTL hodi subtitui Superintendente Xefe Armando Monteiro tanba sai ona adidu seguransa iha Embaixadór Timor-Leste iha Jakarta-Indonézia.
“Hahú horiseik, ha’u simu ona kna’ar foun hanesan portavós Komandu Jerál Polisia Nasionál Timor-Leste (PNTL”, Superintendente Xefe Arnaldo de Araújo ba jornalista sira liuhosi Konferénsia Imprensa iha kuartél jerál PNTL Caicoli, kuarta ne’e.
Ho kargu ne’e, nia promete sei kolabora ho jornalista sira ho di’ak hodi bele transmite no atualiza informasaun sira kona-ba atuasaun Polísia Nasionál Timor-Leste (PNTL) iha territóriu nasionál.
“Ha’u hanoin kna’ar ida ne’e la’ós foun ba ha’u tanba ha’u asume ona kna’ar ida ne’e antes ona durante tinan tolu nia laran no ha’u sei kontinua serbisu hamutuk jornalista sira hodi transmite no atualiza serbisu PNTL nian iha territóriu nasionál ba públiku”, nia kompromete.
Jornalista: Natalino Costa
Editór : Florencio Miranda Ximenes
