DILI, 03 outubru 2023 (TATOLI) – Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino, hasoru malu ho Asosiasaun Turizmu Relijiozu Timor-Leste (ATRTL), ne’ebé tuir planu sei dezenvolve sítiu turístiku ne’ebé identifika ona.
“Ohin ami mai aprezenta servisu kooperasaun ne’ebé ita hala’o ona tinan rua liubá iha sítiu turístiku relijiozu hosi relijiaun lima ne’ebé mak ita la’o daudaun ona”, Pe. Angelo Salchina, dehan ba jornalista sira iha Palásiu Governu, tersa ne’e.
Iha enkontru ne’e, asosiasaun aprezenta relatóriu ba Vise Primeiru-Ministru atu mantein ho kooperasaun hodi tranforma sítiu sira ne’e mais integradu, abranjente ba sustentabilidade iha fatin hirak ne’e.
“Ita-nia núkleu 12 provizóriu no agora ba oin maka ita hanoin atu dezenvolve núkleu sira-ne’e bele hamriik mesak no bele servisu mais intensivu atu dezenvolve sítiu sira ne’ebé ita iha”, Angelo subliña.
Nia hatutan, resposta hosi Vise Primeiru-Miistru pozitivu tebtebes katak konseitu ne’ebé Asosiasaun Turizmu Relijiozu aprezenta kona kedan ho planu Governu kona-ba turizmu komunitáriu nian ne’ebé sustentavél.
Tanba ne’e, Assanami husu atu asosiasaun turizmu kada fulan tolu, bele halo diálogu hodi ko’alia planu sira-ne’e hotu mais vijivél, realizavel iha komunidade rurál nian, iha núkleu sira ne’ebé estabelese tiha ona.
Asosiasaun Turizmu Relijiozu, kompostu hosi relijiaun lima mak Katóliku, Protestante, Komucu, Hindu no Musulmanu. Asosiasaun ne’e harii iha 25, Marsu, 2023, ne’ebé servisu parseria.
Jornalista: Hortencio Sanchez
Editór : Zezito Silva
