BOBONARO, 07 agostu 2024 (TATOLI)-Autoridade Munisipál Bobonaro (AMB) husu ba Konsellu Imprensa (CI, sigla portugés) atu loke formasaun jornalizmu iha postu administrativu Balibo, munísipiu Bobonaro.
Sekretáriu Autoridade Munisípiu Bobonaro, Júlio Carvalho Caero, hateten presiza loke formasaun jornalizmu iha Balibo atu nune’e bele esplora no promove istória ba mundu no banati tuir pronsípiu aten-brani jornalista estranjeiru na’in-lima ne’ebé mate tanba atu publika informasaun ba mundu kona-ba torturasaun no sofrementu ne’ebé Timor-oan sira hasoru iha situasaun difisil nia laran.
Notísia relevante: PR husu komunidade prezerva istória Balibo Five
“Ha’u hanesan ema Bobonaro-oan husu ba Prezidente CI, ha’u rekomenda karik bele loke sentru formasaun nian iha-ne’ebá, nune’e istória ne’e kontinua, sé orsida loke iha Dili ema barak, di’akliu loke iha Balibó atu ema bele movimentu ba Balibó,” nia hateten iha atividade Jantar hamutuk entre Konsellu Imprensa ho Autoridade Munisipál Bobonaro, iha salaun Maria-Tapo, tersa kalan ne’e.
Nia apresia ho inisiativa CI no instituisaun relevanate ne’ebé hetan apoia másimu husi governu no Parlamentu Nasionál hodi deside postu administrativu Balibó sai sidade liberdade no daudaun ne’e propoin tan atu tau avenida Liberdade Impresa hahú husi dalan Batugade ba Balibó vila.
Prezidente Konsellu Imprensa Timor-Leste, Otelio Ote, hateten tinan ida ka rua tan sei loke sentru formasaun no estabelese Rádiu Komunidade ida iha postu administrativu Balibó.
“Ideia ne’e mosu tiha iha tinan ida liubá, ami hein maibé seidauk iha grupu ida atu propoin ba Sekretaria Estadu Komunikasaun Sosiál no CI katak ami prontu ona atu hari rádiu iha Balibó, entaun mai ita hanoin hamutuk,” nia akresenta.
Enkuantu daudaun ne’e munisípiu Bobonaro seidauk iha sentru formasaun Jornalizmu no iha de’it Rádiu Komunidade Maliana, jornalista destakadu husi Ajénsia TATOLI no RTTL.
Notísia relevante: Governu inaugura Monumentu Liberdade iha Balibo
Jornalista: Sérgio da Cruz
Editór: Evaristo Soares Martins
