VIKEKE, 19 Juñu 2025 (TATOLI)-Autoridade Lakluta husu Governu liuhusi Ministériu Obra.Públika (MOP) normaliza ponte Sumaku ne’ebé kotu, ne’ebé difikulta komunidade sira-nia movimentu entre postu ba munisípiu Vikeke.
Ponte Sumaku lokaliza iha suku Uma Tolu, postu administrativu Lakluta, kotu ohin (19/06) afeta husi udan boot hahú husi horikalan to’o agora.
Xefe suku Ahik, Ercilio Soares, hateten, ponte referida kotu beibeik ona, maibé parte relevante sira seidauk tau importansia tanba tempu udan boot mota tun sempre afeta ba ponte kotu hodi difikulta ba komunidade sira nian viajen.
“Nune’e ami autoridade husu ba Governu liuliu MOP sé bele tau importánsia ba ami-nia ponte konstrui ona. Atu nune’e tempu udan mota boot karik, labele kotu tan, hodi labele difikulta ami-nia movimentu husi postu ba munisípiu no munisípiu mai postu”, Ercuilio Soares, ba Tatoli iha postu Vikeke Vila.
Autoridade ne’e dehan, ponte Sumaku autoridade Lakluta hato’o beibeik ona pedidu ba ministériu relevante, maibé seidauk rezolve povu mak sempre vítima ba ponte referida.
“Ami-nia komunidade sira liu labele ona tanba laiha dalan alternativu ruma hodi asesu. Ida agora kotu ne’e, aban parte relevante sira halo ona normaliza, sé lae ami izola iha Lakluta tanba kotu totál motorizada no karreta labele liu,” nia hato’o.
Nia profunda, sé la halo normaliza sedu sei impaktu ba komunidade no mós parte saúde kazu emerjénsia ruma defisil para ultrapasa ba mota sorin.
“Tan ne’e, ami husu dala ida tán ba parte kompetende haree rezolve ami-nia ponte hodi fasilita ami povu Lakluta,” nia katak.
Diretór SMOP Vikeke, Casildo Gomes Soares, haktuir, nia parte simu ona informasaun husi autoridade sira Lakluta kona-ba ponte Sumaku ne’ebé agora daudaun kotu.
“Ohin ha’u simu ona informasaun kona-ba ponte ne’ebé ohin kotu, ita sei buka meiu hodi halo normaliza no ita kontaktu ona Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI,I.P) no empreza lokál sira hodi normaliza,” nia fó hanoin.
Tuir dadus, postu Lakluta kompostu husi suku haat hanesan; Uma-tolu, Dilor, Ahik no Laline, ho total abitante 8.123 husi uma-kain 1.907.
Jornalista : Vitorino Lopes da Costa
Editór : Evaristo Soares Martins
