BAUKAU, 23 Abríl 2025 (TATOLI)-Autoridade Administrasaun Munisipál (AAM) Baukau hasa’e bandeira nasionál meia-haste nu’udar simbolu fó omenajén ba maktoban Papa Francisco.
PAM Baukau, Veneranda Lemos, esplika hafoin governu sentrál fo-sai dekretu-governu kona-ba lutu nasionál, AAM Baukau simu kedas oreintasaun husi Ministériu Administrasaun Estatál (MAE) atu hasa’e bandiera meia-haste nu’udar parte fó omenajém ba maktoban Papa Francisco.
“Desde dadeersan (horiseik) husi munisípiu to’o postu sira, ami dada bandeira iha klaran de’it, orientasaun ne’e mak ami halo”, Prezidente Autóridade Munisipál Baukau ba TATOLI iha Igreja Pro Katedrál Vila antiga, kuarta ne’e.
Veneranda Lemos, relembra hikas bainhira autóridade hamutuk ho Igreja kolabora hodi halo preparasaun liuliu mobiliza sarani sira ba partisipa simu Papa Francisco bainhira halo vizita pastorál iha Timor-Leste ne’ebé konsideradu nu’udar istória no planu Maromak nian.
Eis deputada ne’e dehan triste bainhira rona Papa Francisco fila hikas ona ba Aman Maromak maibé ho prezensa iha Timor-Leste husik hela mensajen espiritúal ne’ebé presiza timoraon hotu halo tuir liuliu fiar hanesan kultura no hadok-aan husi influénsia rai-liur.
“Hanesan ema sente triste maibé kahor ho kontente, tanba Santu Papa to’o ita-nia rai husi hela mensajen, Santu ne’e lori timoroan hotu nia halerik sei hato’o iha Maromak nia futar oin”, Veneranda Lemos hakotu.
Entertantu, autoridade Baukau partisipa mos iha atividade misa requim ne’ebé hala’o iha Igreja Parókia Santu António Vila antiga durante loron-haat ne’ebé sei hola parte husi sarani kada sentru no zona pastorál antes misa jerál Dioseze Baukau nian iha loron sábadu 26 Abríl.
Notísia relevante: Governu dekreta Lutu Nasionál durante loron hitu ba falesimentu Papa Francisco
Jornalista : Natalino Belo
Editór : Rita Almeida
