VIKEKE, 11 fevereiru 2025 (TATOLI)—Autoridade postu administrativu Uatucarbau, munisípiu Viqueque, Anacleto D. Sarmento, hateten daudaun ne’e Governu apoia tratór boot unidade ida ba natar Hae-Oli, suku Irabin de Baixo ektare 36 hodi tetu fali kabubu ne’ebé abandonadu durante tinan 11 nia laran.
“Agora daudaun ita apoia tratór boot ida, hodi tulun ita-nia agrikultór sira tetu hikas kabubu natar nian, tanba natar ne’e abandonadu durante tinan 11, nune’e kabubu sira-ne’e ita haree tetuk hanesan ho rai-tetuk,” Administradór Uatucarbau ne’e hateten ba Agência Tatoli, iha postu Uatucarbau, segunda (10 fevereiru 2025) ne’e.
Daudaun ne’e, nia dehan, tratór sei iha natar Hae-Oli tetu hela kabubu seidauk ramata, nune’e kada loro-loron natar-na’in sira ativu iha natar laran hodi taetu kabubu natar nian.
“Tetu kabubu seidauk hotu ne’e ita-nia agrikultór sira kontinua akompaña servisu iha sira-nia natar laran. Irrigasaun ne’ebé normaliza agora kontinua fornese bee ba natar,” nia dehan.
Aleinde ne’e, nia hateten, fini hare ba natar Hae-Oli nian ne’e, Servisu Ministériu Agrikultura Pekuária, Peska no Floresta (SMAPPF) Viqueque distribui hamutuk saku 12 hodi apoia ba agrikultór sira kuda iha natar Hae-Oli.
“Foin lalais ami simu ona fini hare ba natar Hae-Oli ne’e hamutuk saku 12, ne’ebé ami sei rai iha postu. Depois tetu kabubu ne’e ramata, hafoin fahe ba ita-nia agrikultór sira atu utiliza iha natar Hae-Oli,” nia hateten.
Iha fatin hanesan, xefe suku Irabin de Baixo, José Batista do Carmo, haktuir tratór boot ida daudaun ne’e sei iha natar Hae-Oli hodi tulun agrikultór sira, sei kontinua tetu kabubu ba natar ektare 36.
“Kabubu seidauk tetu hotu, ne’ebé agora tratór boot sei iha natar ne’ebá. Ita-nia komunidade kontinua esforsu tetu sira-nia kabubu natar nian. Depois, tetu hoti tiha
mak sira bele halai natar ba ekpoka 2025,” nia dehan.
Iha fatin seluk, Diretór SMAPPF Vikeke, Olivio da Costa Freitas, haktuir fini hare ne’ebé distribui ona ba natar Hae-Oli ho varidade Nakroma mak apoia agrikultór sira atu kuda ba natar Hae-Oli hanesan natar foun.
“Fini hare ne’e ita koloka ona ba postu Uatucarbau no fini hare ita iha varidade rua nakroman no hare mean. Nune’e, ita apoia ba ita-nia agrikultór sira kuda iha epoka tinan ida-ne’e,” nia dehan.
Tuir dadús, natar husi irrigasaun Hae-Oli ho totál ektare hamutuk 36 no sei fó benifísia ba uma kain 26 iha suku Irabin de Baixo, postu Uatucarbau.
Jorbalista : Vitorino Lopes da Costa
Editór : Cancio Ximenes
