BAUCAU, 19 fevereiru 2024 (TATOLI) – Konsellu Munisipál Kombantente Libertasaun Nasionál (CMCLN, sigla portugés) Baucau hahú prepara no koordena ho autoridade administrasaun hodi selebra loron nasionál veteranu.
Sekretáriu Jerál CMCLN Baucau, Manuel ‘Alari’ da Costa Soares, esplika, liuhosi sorumutu entre entidade hotu iha administrasaun munisipál informa ona kona-bá prosesu preparasaun inklui sekuénsia serimónia hodi selebra loron importante refere ne’ebé tuir planu sei selebra hahú loron 02 to’o 03 fulan-marsu.
“Tinan ne’e sei la konserta iha Dili maibé sei selebra iha kada munisípiu tanba ne’e sei realiza iha resintu administrasaun,” Sekretáriu jerál CMCLN Baucau infroma ba Agência TATOLI iha Vila Antiga, segunda ne’e.
Tema importante iha selebrasaun loron istóriku ne’e mak reflesaun haree ba kotuk tinan-hitu ezisténsia Konsellu Veteranu no tinan-44 hodi hanoin ba futuru ne’ebé mak tinan-ne’e sei realiza iha munisípiu liuhosi orsamentu nasionál ho totál rihun lima.
Liuhosi tema ne’ebé foti ho esperansa bele fanu timor oan tomak liuliu jerasaun foun sira ho objetivu atu eduka no fanu espíritu nasionalismu hodi hatene pasadu no projeta ba futuru liuliu kontribui ba pás no estabilidade nune’e nasaun bele dezenvolve.
“Ita labele haluha pasadu tanba ne’e sei motiva ita hateke ba futuru,” Alari akresenta.
Alari konsidera loron 03 marsu iha tinan-1981 sai fatór importante ba mudansa polítika, liuliu hamosu konseitu unidade nasionál hodi muda estratéjia funu nune’e liuhosi ezisténsia CMCLN bele sai mákina mudansa ba nasaun.
Tuir sekuénsia programa iha loron dahuluk sei loke ho misa inklui kari ai-funan iha semiteiru Loidua Buaibau, Bucoli no tasi no iha loron tuir mai 03 marsu sei hasa’e bandeira partisipa hosi veteranu, estudante no komunidade, divertimentu no komboia motorista.
Jornalista : Natalino Belo
Editór : Evaristo Soares Martins
