DILI, 15 jullu 2024 (TATOLI)—Empreza Alcatel Submarine Networks (ASN) finaliza ona instalasaun repetidór (ekipamentu haforsa no prodús rede tama) rua husi repetidór ualu ba kabu submarinu fibra ótika.
Antes ne’e, Governu realiza ona serimónia boot rua hanesan asinatura ba repetidór ualu ne’ebé tau saudozu no martír sira-nia naran no entrega ‘Golden Buoy’ inklui instalasaun dahuluk ba kabu submarinu fibra ótika ka Timor-Leste South Submarine Cable (TLSSC) iha estasaun aterrajen ka cable leading station ne’ebé sei sai pontu koneksaun kabu husi Bebonuk-Dili bá Darwin.
“Bazeia ba akompañamentu tékniku husi Diresaun Nasionál Infraestrutura no Komunikasaun (DNIK), Autoridade Nasionál Komunikasaun (ANC, sigla portugés), pesoál ida husi Ministériu Agrikultura Peska, Pekuária no Floresta (MAPPF), hato’o informasaun katak daudaun empreza ASN finaliza ona repetidór rua mak hanesan repetidór 4101 husi eroina Saudoza Maria Udu Bele ‘Maria Tapo’ ba repetidór 4102 Saudoza Rosa Bonaparte,” Diretór Nasionál Infraestrutura no Komunikasaun iha Ministériu Transporte no Komunikasaun (MTK), Ambrosio Amaral, informa ba Agência Tatoli, iha ninia knaar fatin, Merkadu Lama, segunda ne’e.
Notísia relevante : PM asina plaka dedikasaun naran eroi ba repetidór fibra ótika
Tuir akordu entre Governu no empreza, iha fulan-agostu ne’e tenke finaliza ona instalasaun nune’e bele koko instalasaun kabu ne’e durante fulan-tolu.
“Instalasaun ne’e la’o neineik tanba iha tasi-laran ne’e presiza han tempu maibé empreza halo nafatin esforsu nune’e ramata tuir akordu,” nia akresenta.
Bazeia ba estudu ne’ebé halo, repetidór ida ba repetidór seluk mínimu ho distánsia kilómetru 100, maibé depende ba tasi nia kle’an, maibé husi kontratu kabu dada husi Timor-Leste to’o Darwin ka destinasaun iha VOCOS Austrália hamutuk kilómetru 650.
Repetidór ualu ne’e mak hanesan naran eroina Saudoza Maria Udu Bele ‘Maria Tapó’, eroina Saudoza Rosa Bonaparte Soares ‘Muki, eroina Saudoza Dulce Maria da Cruz ‘We-We’, eroi Saudozu Fernando de Araújo ‘Lasama’, eroi Saudozu Agustinho do Espírito Santo, eroi Saudozu José da Silva, eroi Saudozu Venâncio Ramos Amaral Ferraz, eroi Saudozu Dinis Carvalho da Silva ‘Nelo Kadomi Timor’.
Jornalista : Arminda Fonseca
Editora : Julia Chatarina
