DÍLI, 11 Juñu 2026 (TATOLI) – Ensinu Sekundáriu Jerál Fitun Naroman Timor Lorosa’e (FINANTIL) dadaun ne’e enfrenta menus fasilidade laboratóriu ba área Siénsia Naturál no Teknolojia Informasaun (TI). Tanba ne’e, estudante sira aprende de’it teoria no menus oportunidade atu halo prátika.
Adjuntu Diretór ESJ FINANTIL, Sabino Ernesto, hateten eskola ne’e iha ona sala laboratóriu ba Siénsia Naturál no TI, maibé sedauk iha fasilidade no ekipamentu nesesáriu atu suporta atividade prátika.
“Estudante sira aprende teoria de’it ba matéria Siénsia Naturál no Teknolojia no Multimédia, maibé prátika sei limitadu tanba fasilidade laboratóriu ne’ebé disponível seidauk sufisiente,” dehan Sabino ba TATOLI iha nia servisu fatin, Aimutin, ohin.
Tuir nia, laboratóriu Kimia, Biolojia no Fizika presiza ekipamentu esensiál sira hanesan test tube, beaker, erlenmeyer, stirrer, papel lakmus no bunsen burner atu estudante sira halo teste, observasaun no esperiénsia sientífika tuir kurríkulu.
Iha área Biolojia, eskola mos presiza mikroskópiu no mesa diseksaun atu ajuda estudante sira estuda sélula, bakteria, mikro-organizmu no estrutura moris nian.
Nune’e mos, laboratóriu IT seidauk iha komputadór sufisiente atu estudante sira bele halo prátika kona-ba daktilografia, instalasaun software no hardware, no dezenvolve kompeténsia dijitál sira seluk.
Atu responde ba nesesidade hirak ne’e, Sabino dehan administrasaun eskola submete ona proposta ba Ministériu Edukasaun hodi husu apoiu ekipamentu no material laboratóriu. “Maibe, to’o agora, proposta ne’e seidauk hetan resposta ofisiál,” nia akresenta.
Dadaun ne’e, ESJ FINANTIL iha sala aula 29 no professor hamutuk 79, inklui mestre voluntáriu na’in neen, ne’ebé fasilita prosesu aprendizajen ba estudante hamutuk 1.036.
Aléin menus fasilidade laboratóriu, Sabino mos husu Governu atu konstrui bee-dalan foun atu prevene inundasaun ne’ebé dala barak akontese iha tempu udan.
Nia hateten katak eskola ne’e laiha sistema drenajen adekuadu. “Situasaun ne’e grave tanba komunidade balu halo uma iha área sira besik eskola no taka bee dalan ho muru sira, ne’ebé halo bee la bele suli ho normal bainhira udan boot.
Rezultadu husi situasaun ne’e mak bee barak tama ba área eskola nian no afeta atividade ensinu no aprendizajen estudante sira.
“Ami husu Governu atu konsidera konstrusaun bee-dalan foun iha área eskola ne’e. Bainhira udan boot, eskola ne’e sai hanesan kolan boot ida ne’ebé difikulta tebes prosesu aprendizajen,” Sabino apela.
Jornalista: Camilio de Sousa
Editór: Filomeno Martins
