DILI, 26 juñu 2019 (TATOLI)—Ministru Justisa, Manuel Cárceres da Costa, hateten ezbosu ba Organizasaun Judisiária oras ne’e tama ona iha faze estudu.
“Iha ona ezbosu ida. Ezbosu ne’e sei iha faze estudu nia laran. Ha’u simu ona pareser hosi Prezidente Tribunál Rekursu rasik, hosi Ministériu Públiku, hosi Sentru Formasaun Judisiária, pareser hosi Defensór Públiku Jerál,” Ministru Cárceres ba jornalista sira iha Palásiu Governu, ohin.
Nia dehan, bainhira estudu ne’e hotu ona sei halo análize hafoin aprezenta ba reuniuan koletiva Konsellu Ministru atu foti desizaun.
“Pareser sira ne’e hotu mai tau hamutuk tiha depois Ministériu Justisa halo fali ezbosu finál ida depois ami sei tuur hamutuk fali para finaliza tiha ezbosu ne’e maka mai Konsellu Ministru,” informa Cárceres.
Nia esplika, bainhira Konsellu Ministru aprova hafoin hatutan liu-ba Parlamentu Nasionál atu halo diskusaun kle’an.
Tuir nia, governu mak prepara ezbosu no sai ba lei ne’e kompeténsia Parlamentu Naisonál nian ona.
Jornalista: Evaristo Soares Martins
Editór: Xisto Freitas
Lee mós notísia ida ne’e: http://www.tatoli.tl/2019/06/lei-organizasaun-judisiariu-importante-ba-reforma-lejizlativa/
