DILI, 27 Novembru 2025 (TATOLI)—The Fédération Internationale de Football Association (FIFA) hamutuk ho Asian Football Confederation (AFC) halo inspesaun ba Estádiu Munisipál Dili hodi haree kondisaun atuál estádiu ne’e inklui fasilidade antes deside Timor-Leste sai uma-na’in iha futuru.
Sekretáriu Jerál Federasaun Futeból Timor-Leste (FFTL), José Adilson Ribeiro, esplika hafoin Governu liuhusi Ministériu Juventude, Desportu, Arte no Kultura (MJDAK) atribui lisensa uzu Estádiu Munisípal Dili ba FFTL, parte ezekutivu hato’o kedas pedidu ba FIFA no AFC nune’e hetan resposta hodi haruka ekipa mai direta hodi halo inspesaun ba Estádiu Munisipál Dili liuliu kompleta fasilidade nune’e futuru Timor-Leste bele sai uma-na’in ba jogu eskala internasionál.
“Ekipa konjunta to’o iha-ne’e horisehik, FFTL prepara konsultan no dadus sira atu halo inspesaun ba Estádiu Munisipál Dili liuliu rekomendasaun sira nune’e bainhira reabilita tuir padraun FIFA no AFC,” Sekretáriu Jerál FFTL informa ba TATOLI iha Otél Luz Clarita, Bidau, Kinta ne’e.
José Adilson relata bainhira rekomendasaun iha ona, FFTL sei halo planu ba kustu orsamentu hodi relata ba FIFA nune’e bele aloka iha tempu badak hodi implementa projetu reabilitasaun Estádiu Munisipál Dili.
“Kondisaun iha kampu laran presiza renova totál, aumenta tan fasilidade seluk hanesan fatin reuniaun no ofisiál sira. Espera bele aselera iha tempu badak,” José Adilson akresenta.
Kondisaun no fasilidade ne’ebé atualmente iha Estádiu Munisipál Dili kompostu saladeaula haat inklui rua ba fatin ekipa jogadór sira, saneamentu, hariis-fatin rua ba feto no mane, loket room, fatin parajen ba ekipa, tribun ba VIP, bisnis no ekonomia ho totál kapasidade akumula adeptu rihun-3, lampu Estádiu haat inklui kampu futeból rasik.
Tuir Kritéria ne’ebé fó-sai husi FIFA, membru nasaun ne’ebé sai uma-na’in ba jogu internasionál presiza prenxe rekizitu sira hanesan estádiu tuir kategoria kompetisaun, Kopa Mundiál presiza kapasidade estádiu rihun 80, Kopa Rejionál rihun 60, jogu entre nasaun nivel A rihun 40, nivel B no C rihun 20 no mínimu estádiu hodi akumula adeptu rihun 5.
Aleinde ne’e, iha mós fasilidade primeiru sokuru, aula kontrola CCTV, odamatan ne’ebé tuir padraun prevene inundasaun, lampu eletrisidade mínimu 2.400 lux no obrigasaun iha genset, destaka seguransa no akomodasaun komplementár sira seluk hanesan fatin ba ekipa jogadór sira, media center, fatin ba ofisiál jogu, médiku no koloka fatin espesiál ba VVIP (Very-Very Important Person).
Estádiu tenke inkluzivu katak iha espasu ba Ema ho Defisiente (EhD) atu asesu no medida kampu tuir padraun, distánsia entre kampu ho bander metru lima (5) no tipu duut hanesan naturál, ibrida no sintestis tuir padraun FIFA.
Entretantu, tuir informasaun, liuhusi rezultadu inspesaun ekipa konjunta rekomenda ba FFTL katak iha futuru Estádiu Munisipál Dili presiza aumenta fasilidade lampu ba kampu, media center, roker room ba abritrajen, aumentu kadeira hodi hasa’e kapasidade estádiu, sistema drenajen, aumenta saneamentu, hadi’a duut no control room.
Jornalista: Natalino Belo
Editór: Xisto Freitas da Piedade
