DILI, 12 Jullu 2025 (TATOLI)–Institutu Nasionál Saúde Públika Timor-Leste (INSP-TL) fó ona formasaun ba pesoál saúde sira hamutuk 710 iha munisípiu Lautein, Bobonaru, Vikeke, Dili no Ataúru, durante Janeiru to’o Juñu tinan ne’e.
“Husi ne’e trimestre dahuluk hamuutk 287 no trimestre daruak hamutuk 423. Pesoál sira ne’e maihusi munsípiu haat hodi tuir formsaun iha área klinikál no formasaun saúde públika nian,” Prezidente Konsellu Diretivu INSP-TL, Merita Monteiro, informa ba jornalista sira iha salaun INSP-TL, Komoro, ohin.
Notísia relevante : Profisionál saúde 24 iha RAEOA tuir formasaun saúde inan ho Oan
Formasaun sira ne’e mak ho naran Interpersonal communication (IPC), treinamentu Agrikultura Sensível Nutrisaun (ASN) ne’ebé liga ba área formasaun saúde publika sira. Nune’e mós, formasaun iha área klínika hanesan suporta vida no emerjénsia tramátiku, servikál kankru, violénsia bazeia ba jéneru.
“Formasaun sira ne’e fó ba pesoál saúde sira atu hasa’e sira-nia koñesimentu no motiva sira atu muda sira-nia mentalidade, ezemplu hanesan antes sira atu atende pasiente sira ne’ebé mak monu hodi rezulta sira-nia liman ain tohar atu halo atendimentu ba pasiente sira la halo tuir nia pasu, maibé depois treinamentu pesoál saúde sira sente fiar-an tanba baibain sira halo loos maibé dalaruma la tuir nia pasu, entaun husi formasaun ne’e antes atu atende ba ema oinsá motiva sira-an sai di’ak,” nia esplika.
Jornalista : Felicidade Ximenes
Editora : Julia Chatarina
