DILI, 10 outubru 2023 (TATOLI) – Ekipa delegasaun hosi Empreza Straf-Kon, Brunei Darussalem, hasoru malu ho Prezidente Repúblika, José Ramos Horta, hodi koalia kona-ba investimentu empreza referidu ba área turizmu.
‘’Delegasaun Brunei nian mai Timor-Leste kuaze dala haat ona hodi haree direta kondisaun Timor-Leste nian no sira identifika ona Dili ho Baucau sai hanesan fatin alvu atu halo investimentu iha área turizmu’’, Embaxadór Timor-Leste iha Brunei Darussalem, Abel Guterres, dehan ba jornalista sira hafoin hasoru malu ho Prezidente Repúblika, Ramos Horta, iha Palásiu Prezidensiál, tersa ne’e.
Nia hakturi, Empreza Straf-Kon hakarak tebes atu investe iha Timor-Leste, tanba ne’e mai hasoru malu ho Prezidente Repúblika. Área turizmu hanesan foku ba investimentu hosi empreza internasionál, liuliu ótel, dezenvolvimentu iha tasi ibun Dili no Baucau.
“Agora ita iha ona faze preparasaun atu selebra akordu ida entre ita ho empreza internasionál atu bele fó dalan ba kompaña hodi hahú halo investimentu, ita tenke halo ona bainhira ita sai membru loloos ASEAN ona, entaun ita presiza kondisaun ne’ebé sufisiente”, nia konklui.
Jornalista: Hortencio Sanchez
Editór : Zezito Silva
