OÉ-CUSSE, 21 setembru 2023 (TATOLI) – Projetu reabilitasaun estrada rejionál ne’ebé ezekuta hosi kompañia Irmão Timor Unipesoál Lda hosi aldeia Oébaha, suku Bobometo hodi liga ponte Bitopa, suku Usitasa’e, pertense sub-rejiaun Oésilo, Rejiaun Administrativa Espesiál Oé-Cusse Ambeno (RAEOA), daudaun ne’e atinje ona 8%.
Notísia relevante: RAEOA reabilita estrada rejionál Oebaha liga ponte Bitopa ho kustu rihun $544-resin
Projetu ne’e, Autoridade RAEOA lideradu Arsénio Paixão Bano, hatuur fatuk dahuluk iha loron 18 jullu 2023 ne’e, ho objetivu atu tulun komunidade sira iha sub-rejiaun Oésilo inklui sub-rejiaun Pássabe no Nitibe sorin tanba liga direita ho ponte Bitopa no ponte Noetoko ba Nítibe nian.
“Ohin, mai sei halo fiskalizasaun ba projetu konstrusaun estrada rejionál hosi aldeia Oébaha liga ba ponte Bitopa, suku Usi-tasa’e, agora nia servisu fíziku la’o maka’as tanba iha foho presiza ekipamentu másimu, entaun nia pursentu to’o ona 8%,” Arsénio Bano ba jornalista sira iha Ponte Bitopa, suku Usitasa’e, kuarta ne’e.
Notísia relevante: Autoridade RAEOA mellora estrada foun iha Oésilo
Bano, informa, projetu estrada rejionál ne’e sei benefísia populasaun sira hosi sub-rejiaun Oésilo, Passabe, Nitibe, tanba inísiu loke estrada foun ne’e kompleta kedas ho ponte, tanba iha tempu udan difikulta tebes populasaun sira hodi hakat mota Noél-Ekat entaun autoridade deside tinan kotuk halo melloramentu estrada ne’e hosi Unidade Jestaun Ekipamentu, agora iha kontinua kedas ba reabilitasaun.
“Tan ne’e ohin ita ba haree projetu ne’e, ita propoin ba kompañia atu aselera, tanba estrada nasionál Tono-Oésilo la’o maka’as ona no estrada rejionál Oébaha sa’e ba Saben sai hanesan dalan alternativu ba movimentu komunidade nian, entaun ita espera antes udan ita bele uza ona,” nia katak.
Nune’e ezekutivu ne’e husu komunidade sira iha suku Bobometo no Usitasa’e atu koopera ho kompañia liuliu ba afetasaun rai no plantasaun, hodi kontribui ba projetu ne’e, bainhira udan monu rai bele uza ona.
Purtantu, projetu reabiltasaun estrada rejionál ne’e nia distánsia kilómetru hitu (7) kompañia Irmão Timor Unip Lda ezekuta ho valór $544,055.33 durasaun fulan sia (9), orsamentu ne’e ba projetu ne’e Autoridade aloka hosi OJE 2023.
Notísia relevante: Joven sira Usitasa’e RAEOA inisiativa ajuda ema no transporte públiku ultrapasa mota Bitopa
Jornalista: Abílio Elo Nini
Editór: Evaristo Soares Martins
