OÉ-CUSSE, 04 janeiru 2023 (TATOLI) – Joven sira hosi aldeia Boqui, suku Usitasa’e, sub-rejiaun Oésilo, hamosu inisiativa no preparadu iha mota-ninin kada loron nune’e ajuda ema no movimentasaun transporte ultrapasa mota Bitopa ne’e.
Bitopa ne’e lokaliza iha aldeia Buqui, suku Usitasa’e, sub-rejiaun Oésilo, nu’udar dalan arternativa ba movimentasaun komunidade mai hosi suku sia (9) pertense sub-rejiaun Oésilo, Pássabe no Nítibe.
“Sira la ta’uk, sira toman ona halimar mota kada loron, sekuandu motorizada ka ema la’o-ain liuhosi mota ne’e, sira prepara ajuda hodi hakat liu, importante ita husu no fó hatene sira,” komunidade Blasco Liub, informa ba Agência Tatoli iha Usitasa’e, kuarta ne’e.
Nia informa, durante joven sira iha mota hetan akompaña hosi inan-aman, hodi observa no kuandu ema ruma lori sasán todan, bele fasilita hodi ajuda.
Nune’e kona-bá selu, ba motorizada ki’ik, $2,50 ba leten no motorizada boot $5.00, no mós ba ema laiha obrigasaun.
“Motorizada ki’ik no boot la husu osan ho obrigatóriu maibé, konforme hosi motorizada na’in, maibé ita ajuda malu ona entaun fó de’it $2,00 mós di’ak, naran katak, fó netik hola sigaru, no osan ne’ebé ami hetan, ema ida mak kaer bainhira hotu ona mak ami fahe malu,” nia katak.
Nia espera iha futuru karik ponte Bitopa konklui ona sei laiha tán ona problema, tanba dalan alternativa hosi sub-rejiaun Passábe, Oésilo no Nítibe balu sei liuhosi ponte ne’e.
Tanba iha 2022, Autoridade RAEOA mellora ona estrada foun hosi bairru Paut, aldeia Oébaha, suku Bobometo, liga direita ba bairru Hau-Ana, aldeia Boqui, suku Usitasa’e, sub-rejiaun oésilo.
Entretantu, kona-bá konstrusaun ponte Bitopa daudaun ne’e konstrusaun la’o hela, ho nia distánsia metru 64 kompleta ho moru protesaun, gabiaun metru 170, sei tulun komunidade suku sia mai hosi sub-rejiaun tolu atu uza hodi transporta produtu asesu ba merkadu iha tempu udan.
Kontrusaun ponte Bitopa ezekuta hosi empreza Am-Lhichoe Unipesoál, Lda, ho valór kontratu hamutuk $406,945.00, ne’ebé Autoridade RAEOA prevee hosi Orsamentu Jerál Estadu (OJE) 2022 nian, ho durasaun serbisu fulan-haat.
Projetu ne’e lansa hosi Prezidente Autoridade RAEOA Arsénio Paixão Bano iha fulan-outubru 2022.
Notísia relevante: Autoridade RAEOA hatuur fatuk dahuluk ba projetu ponte Bitopa
Jornalista : Abílio Elo Nini
Editór : Evaristo Soares Martins
