OÉ-CUSSE, 20 outubru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e hatuur fatuk dahuluk ba projetu ponte Bitopa hodi fasilita komunidade sira mai hosi suku sia (9) iha sub-rejiaun Oésilo, Pássabe no Nítibe atu asesu ba sub-rejiaun Pante Makasar.
Konstrusaun ponte Bitopa lokaliza iha aldeia Buqui, suku Usitasa’e, sub-rejiaun Oésilo, no ponte ne’e rasik nia distánsia naruk metru 64 kompleta ho protesaun moru gabiaun metru 170, sei tulun komunidade suku sia mai hosi sub-rejiaun tolu atu uza hodi transporta produtu asesu ba merkadu iha tempu udan.
Notísia relevante: Autoridade lokál nia esperansa ba futuru konstrusaun ponte Bitopa-Noetoko
Suku sia ne’e komposta hosi suku Usitasa’e, Bobometo no Usitaqueno pertense ba sub-rejiaun Oésilo, suku Abani no Malelat iha sub-rejiaun Pássabe no suku haat seluk iha pertense sub-rejiaun Nítibe hanesan, Ban-Afi, Lela-Ufe, Usitaku no Bene-Ufe.
“Ohin, rejiaun hatuur fatuk dahuluk ba ponte ida sei rezolve problema barak ba komunidade mai hosi sub-rejionál tolu atu asesu ba movimentasaun ema ho sasán maka ponte Bitopa, tinan ne’e autoridade deside halo ponte rua importante. Ida mak Bitopa no ponte Noetoko, ne’e ponte estratéjiku tanba sei liga sub-rejionál hotu inklui Pante Makasar,” Prezidente Autoridade RAEOA, Arsénio Paixão Bano, ko’alia iha serimónia hatuur fatuk dahuluk ponte Bitopa.
Nia afirma, maske ponte Noefefan eziste ona atu rezolve sirkulasaun ema no transporte iha Pante Makasar, maibé tinan barak ona sub-rejionál tolu, Pássabe, Oésilo ho Nítibe nian bainhira tempu udan enfrenta problema kona-bá mota atu asesu ba vila.
Alende halo ponte, autoridade mós mellora estrada foun liga direita suku Bobometo ba Usitasa’e, tán ne’e ponte importante nu’udar fasilidade alternativa tau liga komunidade iha sub-rejiaun tolu ne’e.
Nia apela ba komunidade atu serbisu hamutuk ho empreza koopera malu, hodi aselera projetu ne’e termina tuir kontratu ne’ebé prevee ona, no husu mós ba empreza atu kumpre tempu kontratu atu finaliza ho kualidade.
Jestór sub-rejiaun Oésilo, Domingos Marques, agradese ba Governu tanba bele kontrui ona ponte ne’e, no husu ba komunidade sira atu koopera serbisu hamutuk ho empreza nune’e obra ne’e bele finaliza tuir kontratu ho susesu.
“Ha’u sente kontente tanba durante tinan barak, susar tebes atu asesu estrada bainhira tempu udan, maibé agora hahú halo ona ponte ida-ne’e, no mós ponte ida-ne’e, la’ós benefísia de’it komunidade Usitasa’e maibé ba Oé-Cusse tomak, tán ne’e ha’u husu komunidade iha suku Usitasa’e tanba sira besik liu iha obra ne’e atu serbisu hamutuk ho empreza nune’e obra ne’e bele la’o ho susesu,” nia orgullu.
Ángelo de Conceição nu’udar lia-na’in hosi suku Usitasa’e, agradese ba Autoridade RAEOA, tanba estrada ne’e desde tempu portugés nia tempu to’o ukun foin maka harii ponte ida atu fasilita komunidade sub-rejiaun tolu bele asesu ba Oé-Cusse vila.
“Ha’u kontente tebes, tanba iha estrada ne’e dezde tempu portugés ukun ita, tama to’o Indonézia nia ukun, bainhira tempu udan mota tún ami labele liu, maibé tinan ne’e Autoridade ho inisiátiva loke estrada sa’e husi foto mai tún iha mota hodi kontrui ponte ida-ne’e, atu fasilita komunidade bele asesu ona estrada iha tempu udan,” nia katak
Entretantu, kontrusaun ponte Bitopa ezekuta hosi empreza Am-Lhichoe Unipesoál, Lda, ho valór kontratu hamutuk U$406,945.00, ne’ebé Autoridade RAEOA prevee iha Orsamentu Jerál Estadu (OJE) 2022 nian, ho durasaun serbisu fulan-haat.
Notísia relevante: Empreza Am-Lhichoe no Lifau Indah sei konstrui ponte Bitopa-Noetoko
Jornalista : Abílio Elo Nini
Editór : Evaristo Soares Martins
