OÉ-CUSSE, 14 setembru 2022 (TATOLI)–Autoridade komunitáriu sira hosi suku Ban-Afi no Lela-Ufe, sub-rejiaun Nítibe, iha esperansa ba futuru konstrusaun ponte Bitopa lokaliza iha suku Usitasa’e no ponte Noetoko lokaliza iha suku Ban-Afi, tanba ponte rua ne’e sei rezolve populasaun mai hosi sub-rejiaun tolu, Oésilo, Pássabe no Nítibe bele asesu ona Oé-Cusse vila.
Xefe suku Lela-Ufe, José Neno Sila, informa, iha fulan-jullu Autoridade RAEOA, hahú loke ona konkursu ba ponte Bitopa no Noetoko, iha suku Usitasa’e no suku Ban-Afi, tanba iha futuru sei rezolve komunidade sub-rejiaun tolu hosi Oésilo, Pássabe no Nítibe atu asesu ba merkadu iha tempu udan.
“Ha’u nu’udar xefe suku Lela-Ufe kontente tebes, kuandu autoridade RAEOA atu harii ponte haat, Bitopa iha suku Usitasa’e, Noetoko iha suku Ban-Afi, no ponte ki’ik rua liga direita ba ha’u-nia suku, ida-ne’e ami kontente tanba konkursu ami haree ona, ne’ebé iha futuru sei fó tulun tebes ba ami no komunidade tomak nia sirkulasaun bele liga direita oan ba Oé-Cusse Vila,” xefe suku Lela-Ufe, José Neno Sila, ko’alia iha Oé-Cusse, kuarta ne’e.
Nia afirma, durante tinan barak, komunidade Nítibe, Oésilo no Pássabe to’o tempu udan susar tebes atu asesu ba sub-rejiaun Pante Makasar, tanba mota, maibé espera autoridade bele aselera ponte sira-ne’e nune’e bele fasilita komunidade atu asesu ba merkadu, nomoos lori hahán ba oan sira eskola.
Xefe suku Ban-Afi, sub-rejiaun Nítibe, José Tefa, espera projetu ne’e bele realiza duni tanba ponte hirak-ne’e harii iha dalan elternativa, komunidade hosi sub-rejiaun Oésilo, Pássabe no Nítibe sei asesu hotu.
“Foin daudaun ekipa tékniku sira lori autoridade mai haree no identifika, ha’u dehan laiha problema kona-bá komunidade nia rai ka plantasaun, tanba tinan ne’e dezenvolve hahú dada besik mai ami iha área rurál, entaun ita hotu sei kontribui tanba ne’e halo ba povu atu fasil bele asesu iha tempu udan,” nia katak.
Nia sujere, bainhira konstrusaun sira-ne’e hahú presiza emvolve juventude sira iha suku laran, sai traballadór, labele uza fali traballadór hosi munisípiu seluk no fatin seluk, maibé tenke iha suku ne’e rasik nia ema.
“Empreza bele uza tékniku hosi fatin seluk, maibé traballadór lokál sira tenke hosi suku laran, liuliu ba hili fatuk ka suru masa no halo bee-dalan, ida-ne’e tenke rekruta hosi suku laran, labele bolu hosi fatin, nune’e evita problema ka diskriminasaun,” nia sujere.
Entretantu, iha 29 jullu 2022 ne’e Autoridade Rejiaun Administrativa Espesiál Oé-Cusse Ambeno (RAEOA), hahú loke konkursu públiku ba emprezáriu lokál sira atu konkore hodi konstrui ponte alternativa rua iha sub-rejiaun Oésilo no Nítibe iha tinan ne’e.
Ponte rua ne’e maka hanesan, ponte Bitopa lokaliza iha suku Usitasa’e, sub-rejiaun Oésilo no ponte Noetoko lokaliza iha suku Ban-Afi, sub-rejiaun Nítibe, no ponte kiik rua liga ba suku Lela-Ufe, sub-rejiaun Nítibe.
Jornalista: Abílio Elo Nini
Editór: Evaristo Soares Martins
