OÉ-CUSSE, 05 outubru 2022 (TATOLI) – Rezultadu konkursu públiku ba konstrusaun ponte ba mota Bitopa, ne’ebé lokaliza iha suku Usitasa’e, sub-rejiaun Oésilo no ponte Noetoko, lokaliza iha suku Ban-Afi, sub-rejiaun Nítibe iha ona rezultadu finál, manán hosi empreza lokál Am-Lhichoe Unipesoál Lda no empreza Lifau Indah Unipesoál Lda.
Diretór Rejionál Infraestrutura, Candido dos Reis Amaral, informa, bazea ba dekretu-lei númeru10/2005, artigu 89.2 kona-ba Rejime Jurídiku Aprovizionamentu (RJA), RAEOA no ZEESM nian, liuhosi Unidade Aprovizionamentu no Lojístika, intensaun ba ajudikasaun ba empreza ne’ebé konkore ba konkursu públiku ba títulu projetu RAEOA-ZEESM TL/SRF/UAL/2022-063.
Nune’e bazea rezultadu avaliasaun hosi painél avalizasaun ba tékniku no finanseiru, tuir matrix avaliasaun iha dokumentu konkursu, entaun tuir matrix avaliasaun haree liu ba abilitasaun profisionál, kapasidade tékniku no esperiénsia no mós kapasidade finanseira.
“Tán ne’e rezultadu anúnsia ona katak ponte Noetoko inklui ponte ki’ik rua iha Neofmetan liga suku Lela-Ufe manán hosi Lifau Indah ho valór U$625,451.54 no ponte iha mota Bitopa manán hosi Am-Lhichoe ho valór U$406,945.00,” Candido Amaral, hatete, iha Oé-Cusse, kuarta ne’e.
Nia informa, bainhira empreza simu ona karta aseitasaun sei aprezenta-aan ona iha Diresaun Infraestrutura liuhosi servisu estrada no ponte kontrolu no cheias halo ona enkontru ho empreza rua ne’e, atu introdús sira-nia preparasaun no planu serbisu.
“Prezidente Autoridade fiskaliza ona fatin konstrusaun ba fatin rua ne’e, ne’ebé ita hein iha outubru ne’e sei halo serimónia hatuur fatuk dahuluk, tanba durasaun ba konstrusaun rua ne’e durante fulan haat,” nia katak.
Nia afirma, modelu ba ponte rua ne’e sei uza modelu multi-paid art brits, aplika modelu hanesan ponte tuan iha Bihala, suku Bobokase no ponte Oebaha iha suku Bobometo, tanba ezisténsia ponte rua-ne’e dezde tempu okupasaun to’o ukun-aan nafatin kualidade.
Nune’e faze implementasaun sei la defisil ba empreza sira atu konstrui, tanba sei halo instalasaun de’it tuir materiál fabrikadu nian, sei akompaña hosi tékniku halo inspesaun hotu bele hahú ona serbisu.
Notísia relevante: RAEOA loke konkursu públiku ba ponte rua iha Oésilo-Nítibe
Jornalista : Abílio Elo Nini
Editór : Evaristo Soares Martins
