DILI, 02 novembru 2023 (TATOLI) - Komandante Polísia Nasionál Timor-Leste (PNTL) Munisipiu Bobonaro, Superintendente Xefe, António de Sá, informa joven ida hetan taa hosi ema deskoñesidu iha Suku Lourba, Postu Administrativu Maliana, Munisípiu Bobonaro.
Komandante ne’e haktuir, joven ne’e hetan taa bainhira nia fila hosi tau ai-funan iha rate iha Suku Lourba nian.
“Ha’u seidauk hetan relatóriu kompletu, maibé informasaun prelemináriu ne’ebé ha’u iha katak kazu ne’e akontese iha loraik ne’e, bainhira joven ne’e fila hosi tau ai-funan iha rate iha área Lourba nian, derepente hetan taa hosi ema deskoñesidu iha nia liman. Supeitu ita seidauk identifika”, Superintendente Xefe, António de Sá, hateten ba jornalista TATOLI via telefone, kinta ne’e.
Nia dehan, Batalão Orden Públika (BOP) hamutuk ho PNTL Bobonaro iha ona terenu hodi halo atuasaun ba problema ne’e.
“Ha’u-nia ekipa hamutuk ho BOP sei iha hela terenu hodi atua situasaun ne’e no vítima ne’ebé hetan taa transporta ona mai iha óspitál referrál Maliana hodi halo tratamentu no tuir informasaun katak vitíma hetan suku ho pontu neen iha nia liman no agora prosesu atendimentu ba vítima sei la’o hela”, nia adianta.
António hateten, problema ne’e nia motivu liga ho Grupu Arte Marsiál, maibé prosesu investigasaun sei lao hela.
“Ha’u seidauk simu relatóriu ruma maibé problema ne’e deskonfia iha ligasaiun ho Grupu Arte Marsiál no Kolimau, maibé ekipa iha hela terenu no sei investiga kazu depois mak ita foin hatene lolos nia motivu”, nia informa.
Jornalista: Natalino Costa
Editór : Zezito Silva
