DILI, 21 setembru 2023 (TATOLI)—Komisaun A trata asuntu Justisa no Konstituisionál iha Parlamentu Nasionál (PN), husu ba Komisaun Funsaun Públika (KFP), atu hadi’a mekanizmu teste promosaun grau ba funsionáriu públiku liuhusi sistema eletrónika liuliu ba funsionáriu sira hanesan dasa-rai, eletrisista ho kanalizadór bee no saneamentu.
“Teste promosaun grau fatin seluk ita kontente ho dizitalizasaun sistema pasu ida, maibé parte seluk hamosu insatisfasaun hosi funsionáriu sira. Iha apresiasaun programa IX Governu, ha’u mak aprezenta ona preokupasaun ne’e. Funsionáriu sira seidauk prepara, ezemplu, ami dasa rai, eletrisista, kanalizadór, ami tuur la’ós iha komputadór oin mak barak, maibé ami tempu barak liu iha li’ur. Nune’e, husu Prezidente KFP mai ita hamutuk hadi’a,” Membru komisaun A, Deputadu, António Moniz Calau, aprezenta preokupasaun ne’e bainhira hala’o fiskalizasaun no vizita hodi haree direta serbisu KFP iha edifísiu KFP, Matadoru, kinta ne’e.
Nia apresia ho sistema modernizasaun eletrónika ne’ebé durante ne’e la’o iha KFP ho transparánsia tanba bainhira funsionáriu teste hotu sai mai hetan kedas nota, maibé triste ba funsionáriu ne’ebé dasa rai.
Membru komisaun A, Deputadu Romeio Moizes, hateten sistema teste eletróniku ba funsionáriu públiku tuir teste dala barak ona hosi faze dahuluk to’o datoluk maibé la liu nafatin liuliu funsionáriu sira serbisu nunka tur iha komputadór nia oin hanesan dasa rai, kanalizadór, eletrisista, hanoin KFP presiza foti desizaun ona labele depende makaas ba sistema modernizasaun teste eletróniku ne’e, tanba sira nunka servisu ho komputadór maibé bolu sira ba tuir teste liuhosi eletrónika.
Membru komisaun A, Deputadu Joaquim dos Santos, koloka mós kestaun siziliu matéria teste eletrónika.
Hatán ba preokupasaun ne’e, Komisária KFP ba Protofóliu Finansa, Baze Dadus, Pensaun no Reforma, Protókolu no Komunikasaun, Maria de Jesus Sarmento, rekoñese preokupasaun teste promosaun barak sente duni todan ba sira uza eletronika.
“Maibé ami-nia desiminasaun la’o perkore ba to’o iha munisípiu no postu, iha ne’eba funsionáriu sira hato’o iha preokupasaun, maibé ami fasilita atu bele tuir teste, maibé oinsá sira-nia matenek, tanba ita haree hotu-hotu hatene uza telemóvel nune’e fó hanoin bele tuur hela kaer maus komputadór,” nia dehan.
Prezidente KFP, Faustino Cardoso, hateten tuir dadus KFP rejista funsionáriu 406 laiha diploma, maibé sira hatene telefone no iha abilidade literasia iha maibé abilidade dijitál menus.
Entaun komisaun hahú serbisu hamutuk ho Institutu Nasionál ba Administrasaun Públika (INAP) hodi fó formasaun ba funsionáriu sira la’o tiha ona hahú hosi Ainaro tanba barak liu iha ne’eba, no formasaun mós iha Baucau.
“Maibé bainhira mai prosesu teste mós Komisaun Funsaun Públika halo simulasaun, ne’ebé Deputadu sira lalika preokupa ha kondisaun atu hakat liu,” nia dehan.
Kona-ba funsionáriu sira teste faze dalabarak ona la liu, KFP kontinua hala’o tanba lei mak hateten komisaun aplika tuir lei de’it.
Aleinde ne’e, Prezidente KFP ne’e hatán kona-ba teste eletróniku ninia siziliu no matéria iha Komisaun Funsaun Públika rasik iha ekipa ida hodi haree ne’ebé lidera direta hosi Prezidente KFP rasik ne’ebé garante ninia sizíliu, no kona-ba mateira la hanesan koresponde ba grau ida-idak no mateira abranje ba buat oioin.
Komisaun A vizita KFP
Vise Prezidente Komisaun A trata asuntu Justisa no Konstituisionál iha Parlamentu Nasionál (PN), lideradu hosi Deputadu António Verdiál de Sousa ho membru komisaun, kinta ne’e hala’o fiskalizasaun ka vizita hodi haree direta serbisu Komisaun Funsaun Públika iha edifísiu KFP, Madatouro, Dili.
“Dala uluk, hakarak agradese ba Prezidente Komisaun Funsaun Públika ne’ebé simu ami-nia pedidu hodi mai to’o iha ne’e hodi haree besik liután serbisu sira no sai mós matéria mai ami nu’udar Komisaun A ne’ebé haree mós ba asuntu administrasaun públika,” Vise Prezidente Komisaun A, Deputadu Verdiál hatetn.
Nia dehan, biban ne’e mós Deputadu sira hosi komisaun bele hato’o preokupasaun balun ne’ebé durante rejista iha fiskalizasaun ba munisípiu sira hodi bele KFP tau atensaun.
Prezidente KFP, Faustino Cardoso, hato’o benvindu ba Deputadu Komisaun A hodi bele mai haree hesik serbisu funsaun públika nian.
Bibán ne’e, Prezidente KFP aprezenta ba komisaun kona-ba KFP dezenvolve modernizasaun sistema dijitalizasaun hodi fó sai kona-ba situasaun funsionáriu públiku iha territóriu.
“Aprezentasaun situasaun baze dadus Komisaun Funsaun Públika dezenvolve hela iha ámbitu dijitalizasaun ka governasaun eletróniku,” nia hateten.
Durante aprezentasaun ekipa IT sira aprezenta sistema dijitalizasaun iha funsaun públika ne’ebé durante dezenvolve hodi fó sai kona-ba situasaun funsionáriu públiku iha territóriu.
Hanesan sistema SIGAP-FOUN baze dezenvolvimentu sistema nia prosesu to’o ne’ebé ona no oin oinsá ba oin ne’ebé dezenvolve hela iha ámbitu dijitalizasaun ka governasaun eletróniku.
Aleinde KFP mós aprezenta dijitalizasaun sistema eletróniku dasbord fó sai dadus públiku kona-ba situasaun funsionáriu públiku iha Timor-Leste, sistema ne’e dezenvolve iha tinan 2016 agora jere direta hosi timoroan sira,
Iha sistema ne’e fó sai mós kona-ba dadus estatístika funsionáriu forsa traballu funsaun públika daudaun rejista hamutuk 37,439.
Nia fó sai jestaun avaliasaun dezempeñu, jestaun kolokasaun, jestaun estrutura organika, jestaun falta, jestaun distinsaun no prémiu, jestaun banku, jestaun kareira, jestaun divizaun administrativa, jestaun funsaun, jestaun kartaun funsionáriu, jestaun dokumentu manual, jestaun abilitasaun akadémika.
Komisaun mós atualiza prosesu rekrutamentu no promosaun grau liuhosi teste eletróniku no online hahú ona no planu atu to’o ba rejionál.
Biban ne’e, Prezidente KFP entrega pakote informasaun entrega ba Deputadu sira kompostu hosi konteúdu relatóriu anuál 2022, livru dezáfiu funsaun publika iha IX Governu Konstituisionál, livru tama ASEAN haree situasaun funsaun publika ita nian no forsa traballu, nesesidade tama ba ASEAN, partisipasaun KFP iha ASEAN kona-ba funsaun públika, hatán misaun informasaun ba komisaun A iha funsaun públika hosi fulan janeiru-setembru 2023.
Biban ne’e, Deputadu Komisaun A vizita mós fatin ba teste eletróniku ne’ebé durante ne’e hala’o ba funsionáriu públiku promosaun grau no teste sira seluk, inklui konstrusaun edifísiu própriu.
Jornalista : Nelson de Sousa
Editór : Cancio Ximenes
