VIKEKE, 29 Juñu 2026 (TATOLI)—Xefe Suku Uma-Tolu, Postu Admninistrativu Lakluta, Munisípiu Vikeke, Eduado Soares, informa agora daudauk komunidade uma-kain 30 husi Aldeia Krarek-Maruk, Suku Uma-Tolu asesu ona bee-moos ne’ebé apoia husi organizasaun internasionál Adventist Development and Relief Agency (ADRA).
“Uluk ita-nia komunidade husi Aldeia Krarek-Maruk hasoru difikuldade ba bee-moos, nune’e foin lalais parseiru ADRA mai ami-nia suku ami aprezenta komunidade nia problema ba sira, entaun sira deside implementa programa melloramentu sistema bee-moos bai ta-nia komunidade,” Eduado TATOLI iha Postu Lakluta, Segunda ne’e.
Nia haktuir ADRA apoiu materiál ba komunidade no komunidade sira mak hamutuk ho tékniku sira husi ADRA implementa programa referidu.
“Programa ne’e ita hahú implementa iha fulan-Marsu 2026 no konklui ona iha semana kotuk. Komunidade, autoridade lokál no veteranu sira iha aldeia hamutuk hodi halo servisu kanalizasaun nian hanesan kria morru protesaun ba tanke rezervatóriu litru 11.000, kanaliza kanu bá komunidade nia hela fatin,” nia akresenta.
Eduardo esplika sistema melloramentu bee-moos ne’e uza sanyo ne’ebé liga bá tanke rezervatóriu, hafoin fahe ba komunidade ho débitu litru 20 pursegundu.
Kona-ba jestaun bee, nia subliña katak komunidade aldeia kria regra ida ba jestaun bee-moos nian ne’ebé kada uma-kain sei kontribui osan $1 iha kada fulan ba manutensaun. Regra seluk mak komunidade deside hamutuk bee loke tuir oras komesa tuku 15h00 lokraik to’o tuku 17h00.
Jornalista: Vitorino Lopes da Costa
Editór: Xisto Freitas da Piedade
