BOBONARU, 18 Juñu 2026 (TATOLI) – Progresu fíziku implementasaun projetu konstrusaun postu no kazerna ba Unidade Patrullamentu Fronteira (UPF) iha Mozon, aldeia Tunubibi, suku Tapo-Memo, postu administrativu Maliana, munisípiu Bobonaru, daudaun ne’e atinje ona 60%.
Enjeñeiru empreza konstrutora, Filomeno Pererra Leite, dehan katak durante ne’e serbisu paradu tanba mudansa ba dezeñu no Bill of Quantity (BoQ), maibé daudaun ne’e kontinua hikas fali no tama ona faze prepara atu taka zinku.
“Muda nia item sira, uluk uza de’it besi, agora muda uza kolom fali. Depois ami hein fali husi nasionál tanba sira mak fó fali mudansa no dezeñu foun ne’e mai, agora didin sira hotu ona, reboka hela, hein de’it kalen husi Surabaia mai ne’e bele tama ona ba 80%. Tinan ida-ne’e bele finaliza ona”, nia dehan.
Antigu Xefe Aldeia Tunubibi, Fernando Raul, husu ba empreza atu aselera projetu ne’e tanba progresu fizíku la’o atraza. “Postu Mozon ne’e nia konstrusaun la’o lentu la halimar. Tuir ha’u, konstrusaun ida-ne’e hala’o iha VIII Governu nia mandatu to’o agora la finaliza, maibé iha nia mudansa ba dezeñu parese ke han tempu, tanba uluk ne’e atu didin de’it ho kalen, maibé Governu foun mai dehan uza fali bloku”, nia dehan.
Biban ne’e, Fernando Raul konkorda ho politíka IX Governu ne’ebé dedide halo mudansa ba dezeñu no BoQ tanba forsa segursansa presiza serbisu no hela iha fatin dignu.
“Haree ba situasaun reál ba seguransa forsa nia, ha’u hanoin ne’e nesesidade duni tanba forsa nia fatin labele didin ho kalen, ne’e iha risku boot ba ita-nia forsa ne’ebé uza fatin iha kedan fronteira. Problema mak tanba saida atu troka de’it ida-ne’e tenke han tempu tinan ba tinan ne’e, ida ne’e mak pergunta boot ida ba ami komunidade”, nia kestiona.
Konstrusaun uma unidade haat ne’e kompostu husi dormitóriu ba polísia UPF feto no mane, edifísiu serbisu, sala reniaun no armazein.
Empreza Erquina Unipessoal Lda., ne’ebé hala’o serbisu liuhusi subkontratu ho kompañia Hugo Amor Unipessoal Lda., selebra ona kontratu foun ho Governui ha Dezembru 2025. Kontratu ne’e sei termina iha dezembru 2026 ho montante osan hamutuk $476.100-resin.
Jornalista: Sergio da Cruz
Editora: Maria Auxiliadora
