DILI, 17 outubru 2022 (TATOLI)—Prezidente Rejiaun Administrativa Espesiál Oé-Cusse (RAEOA), Arsénio Paixão Bano hateten, bazea ba avaliasaun durante ninia vizita hamutuk ho eis-Prezidente RAEOA, Marí Alkatiri, iha Lisboa, Portugál, hatudu katak konstrusaun fíziku ró Haksolok nian atinje ona 65%
Notísia Relevante: Alkatiri: “Ita hahú prepara tripulante ba Ró Haksolok”
“Ha’u hala’o sorumutu ho Primeiru-Ministru, Taur Matan Ruak, hodi aprezenta pontu importante tolu ne’ebé mak ha’u konsidera importante tebes durante vizita hosi ró Haksolok ba Portugál,” Arsenio Bano Paixao, hateten ba jornalista sira hafoin hasoru malu ho Xefe Governu iha Faról, segunda ne’e.
Tuir ofisiál ne’e ne’e haktuir, pontu dahuluk mak empreza ne’e sei hadi’a kondisaun hanesan estaleiru ba konstrusaun ró Haksolok nian, tanba kondisaun fíziku hosi ró Haksolok nian to’o ona 65%. Tan ne’e, kompañia ne’e sei hadi’a estaleiru ne’ebé antes ne’e ramata ona.
Prezidente RAEOA ne’e hateten, pontu daruak mak RAEOA sei rekruta timoroan balun atu fó formasaun ba kursu estaleiru foun iha país ne’e.
Objetivu hosi rekrutamentu ne’e atu fó biban ba ró sira seluk hodi halo manutensaun ba kondisaun fíziku hodi fó reseita ba kofre Estadu Timor nian.
“Bainhira ami-nia ró Haksolok mai iha Timor-Leste, ami-nia Estadu sei iha estaleiru foun ida,” nia esplika.
Arsenio Bano hateten, RAEOA sei rekruta mós ekipa foun hosi ró Haksolok ne’ebé durante ninia operasaun iha país ne’e.
Prezidente RAEOA mós arrepende ona ho postu balun iha Komunikasaun sosiál kona-ba pedidu adisionál ba fundu hosi RAEAO, hosi ró-ahi Haksolok ne’e ho valór dolar amerikanu millaun $16.
“Ha’u hanoin katak livru ne’e la loos. RAEOA sei la fornese orsamentu ho montante millaun $16 ba ró Haksolok nian. Tanba ne’e, nu’udar Prezidente RAEOA nian ha’u la husu orsamentu ruma iha OJE tinan 2023 ba ró Haksolok ne’e,” nia dehan.
Notísia Relevante: Presiza Tan Millaun $14 Hodi Finaliza Konstrusaun Ró Haksolok
Jornalista : Osoria Marques
Editór : Cancio Ximenes
