DILI, 03 Juñu 2026 (TATOLI)—Lica-Lica Lemorai FC “come back” hodi hatudu espíritu luta ekstraordináriu bainhira hetan rezultadu husi 0-1 ba 3-1 hodi manán Académica FC 3-2, iha jogu dramátiku jornada terseira Grupu B LFTL Segunda Divizaun 2026 ne’ebé realiza iha Estádiu Munisipál Dili, kuarta loraik ne’e.
Golu husi Jonas Savio, David Correia, no misíl Tonito Belo nian iha minutu 80 kansela golu sedu Norberto Ximenes nian, no lori Lica-Lica sa’e ba pozisaun segundu ho pontu haat (4), enkuantu Académica hatuur an iha tabela okos ho derrota terseira konsekutiva.
Jogu ne’ebé dirije husi árbitru prinsipál Lucas Felux, ho asisténsia Felomeno da Silva, Peregrino dos Reis, no árbitru rezerva Arceno Correia, hahú ho surpreza.
Académica FC lideradu husi treinador Lusinho da Silva, presiza de’it minutu haat (4) atu loke markadór. Liu husi eskema tranzisaun lalais, avansadu Norberto Ximenes (20) esplora espasu iha kosta defeza Lica-Lica nian no finaliza ho xutu “one-touch” hafoin simu pasa longu husi liña klaran rezulta 1-0 ba Académica.
Golu sedu la halo Lica-Lica ne’ebé lidera husi Nelson Soares paniku. Ekipa responde ho mudansa tátika graduál, muda ba formasaun 4-2-3-1 ho “widening the pitch” liuhusi jogador Nencio Fernandes (11) no Diogo Soares (7).
Dominasaun pozisionál rezulta golu empata iha minutu 35. Hafoin sirkulasaun bola pasiente husi defeza to’o atake, médiu-ofensivu Jonas Savio (19) tama husi “blind side” defeza Académica nian no suta kruzadu ba rede hodi muda rezultadu 1-1.
Iha Segunda parte, jogadór Lica-Lica David Correia (28) hetan kartaun kinur iha minutu 55 tanba “tactical foul” hodi hapara kontra-atake, nia redime an iha minutu 74. Aproiveita kobransa kantu husi Ivo Pinto (22), Correia sa’e aas liu defeza tomak no kabesada forte ba baliza 2-1.
Dolar ba iha minutu 80, defeza-sentrál ho instintu atake Tonito Belo (23) marka golu semana nian. Nia simu “second ball” husi li’ur área laran hafoin Académica nia defeza Tonito lansa xutu distánsia naruk husi metru 25 ne’ebé tama “kantu superior” eskerda baliza, sem hipótese ba guarda-rede João da Costa (31) sai 3-1.
Académica tenta halo reajen no konsege redús iha minutu 90+5 liu husi suplente Sonny Aplunggi (7), ne’ebé aproveita konfuzaun iha área laran hafoin kantu, hodi xuta ba rede. Maibé tempu la to’o ona, jogu ramata 3-2 no vitória monu ba Lica-Lica.
Académica mós lakon Juvinal Boavida (19) ba kartaun kinur tanba “late tackle” hasoru Jaserlito de Jesus (26).
Vitória ne’e lori Lica-Lica Lemorai FC ba pozisaun segundu Grupu B ho pontu 4 husi jogu 3: manán ida (1), empata ida (1), lakon ida (1). Ekipa agora iha dalan klaru ba luta promosaun, tuir líder Hivers Dili FC ho pontu hitu (7).
Sorin seluk, Académica FC iha krize profunda. Derrota terseira konsekutiva halo sira iha pozisaun tabela okos liu ho pontu zero (0) no presiza milagre iha jogu restante atu evita eliminasaun sedu. Ida-ne’e halo treinador Lusinho da Silva iha presaun boot.
Skuad Lica-Lica Lemorai
Timoteofilo Romuldo (42); Henrique da Costa (29), Demelson Arcanjo (24), Tonito Belo (23), Jaserlito de Jesus (26); David Correia (28), Jonas Savio (19), Ivo Pinto (22); Tonzo Madeira (6), Diogo Soares (7), Nencio Fernandes (11).
Treinador: Nelson Soares.
Jogadór Suplente
Januario Alves (30), Lucio Barros (21), Zenio Soriano (13), Armindo Amaral (20), Joanico Noronha (15), Florindo Pinto (8), Kevin Fernandes (12), Faviano Esteves (27), Jacob Gomes (5), Mario Qefi (17), Placido Nascimento (25), Jyzeus Vong (18), Mario Freitas (10), Rui Freitas (9).
Skuad Académica
João da Costa (31), Antonio Ximenes (13), Calistro Pereira (12), Leandro Amaral (24), Vasco Boavida (2); Jefrianto Soinbala (4), Januario Fonseca (17), Figores Sarmento (26); Yusif Alhassan (8), Juvinal Boavida (19), Norberto Ximenes (20).
Treinador: Lusinho da Silva
Jogadór Suplente
Otilio Guterres (1), Tomas Lopes (29), Sonny Aplunggi (7), Romit Mendonça (3), Daniel da Costa (10), Messi Korwa (6), Jeovaldo da Costa (27), Mariano Soares (5), Gregorius Ruing (16), Romario da Silva (15), Gilberto de Jesus (21), Ayuto Tokuda (25), Asep Ribeiro (32).
Jornalista : Horténcio Sanchez
Editór : Cancio Ximenes
