DILI, 20 Outubru 2025 (TATOLI)–Sekretáriu-Jerál Organizasaun Nasaun Unida (ONU), António Guterres konsidera, estatístika sai nu’udar importánsia dadus ne’ebé loos, independente, no konfiável hodi alkansa dezenvolvimentu sustentável ba ema hotu.
Kestaun ne’e hato’o durante fó mensajen ba komemorasaun Loron Mundiál Estatístika, ho tema ‘Kualidade Estatístika no Dadus ba Ema Hotu’, ne’ebé selebra kada tinan-lima iha loron 20 Outubru.
“Loron Mundiál Estatístika nian hanesan momentu krusiál ida hodi destaka papél estatístika nian hodi rezolve dezafiu globál sira hanesan mudansa klimátika, dezigualdade sosiál, no krize ekonómika,” nia hato’o.
Notísia relevante : INE-TL realiza semináriu kona-ba oinsá lidera estatístika nasionál
Nia dehan, Loron Mundiál Estatístika maka hanesan okaziaun ne’ebé destaka papél vital estatístika hodi ajuda hasoru dezafiu tempu agora. Dadus ne’ebé oportunu, loos, dezagregadu no independente mak sai hanesan krusiál hodi rezolve dezafiu globál sira ne’ebé interligadu.
Sekretáriu-Jerál ONU subliña, Objetivu Dezenvolvimentu Sustentável (ODS) sira transforma ona sistema estatístika sira iha mundu hodi hasa’e disponibilidade dadus no hametin kapasidade husi instituisaun nasionál sira hodi halibur no analiza informasaun sira.
Sistema estatístiku sira hatudu ona reziliénsia iha tempu krize hanesan pandemia COVID-19. Dadus ne’ebé sira hamosu la’ós de’it ajuda salva vida maibé mós hanesan forma baze ba rekuperasaun sosiál no ekonómika iha nasaun oioin.
“Observasaun tinan ida-ne’e reafirma ami-nia kompromisu ba Prinsípiu Fundamentál ba Estatístika Ofisiál mak hanesan imparsialidade, profisionalizmu no kompromisu ba prinsípiu sientífiku no étika profisionál,” nia tenik.
Enkuantu, sidadaun hotu iha mundu daudaun ne’e iha direitu atu asesu ba dadus ne’ebé konfiável hodi informa polítika públika no hametin responsabilizasaun.
Guterres konklui nia mensajen ho apelu ida atu kontinua defende kbiit dadus nian hodi harii futuru ida ne’ebé sustentável no inkluzivu liu.
“Mai ita uza loron ida-ne’e hodi defende kbiit husi dadus hodi avansa ba dezenvolvimentu sustentável ba ema hotu,” nia reforsa.
Jornalista : Arminda Fonseca
Editora : Julia Chatarina
