BAUKAU, 26 Marsu 2025 (TATOLI)—Kompañia responsável projetu hahú halo manutensaun ba estrada urbana Baukau Vila diresaun rotunda Vila Nova to’o Nagardjo.
Diretór Serbisu Munisipál Obra Públika Baukau, Agostinho Ximenes, esplika projetu manutensaun estrada urbana referida kompañia selebra kontratu iha tinan 2023 no obra ne’e foin ezekuta tanba iha mudansa Bill of Quantities (BoQ-sigla inglés) no tuir kontratu sei finaliza iha fulan-jullu tinan-ne’e.
“Ita halo manutesaun de’it atu fasilita movimentu transporte liuliu vendedór sira asesu bá merkadu Tuanau,” Diretór Serbisu Munisipál Obra Públika Baukau hateten iha Sentru Konvensaun Baukau (CCB-sigla portugés), kuarta ne’e.
Agostinho dehan Governu liuhosi Ministériu Obra Públika deside kontratu kompañia lokál tanba konsideradu estrada urbana Baukau presiza halo manutensaun hanesan normaliza hikas estrada ne’ebé kuak liuliu subida ho tipu cor nune’e prevene akontese dezastre tráfegu.
Servisu Obra Públika Baukau kontinua husu kompañia responsável atu aselera serbisu iha terenu hanesan ateru no cor kuak sira liuliu subida iha diresaun rotunda Vila Nova bá merkadu Tuanau inkluindu to’o Nagardjo ho distánsia kilómetru 3.5.
Entretantu, Kompañia Roman Grigo Unipessoal, Lda mak responsabiliza ba manutensaun estrada urbana Baukau Vila, ho totál orsamentu rihun $600, distánsia hamutuk kilómetru 23.
Akordu ne’ebé asina iha fulan-Maiu 2023 ho numéru MPW-W-280040 ho akordu serbisu rutina manutensaun liuhosi baze performasaun lokaliza iha Baukau Vila.
Jornalista: Natalino Belo
Editór: Xisto Freitas da Piedade
