DILI, 31 agostu 2023 (TATOLI) – Ministru Agrikultura Peskas, Pekuaria no Floresta, Marcos da Cruz, hateten MAPPF planea sei sosa tratór bo’ot hamutuk 25 atu bele fila rai sira ne’ebé agora daudaun sei abandonadu, tratór hirka ne’e bele ajuda hodi bele hasae produsaun.
Nia dehan, tratór 25 sei hola ho orsamentu retifikativu 2023.
“Agora daudaun iha orsamentu retifikativu, ita atu sosa tratór bo’ot hamutuk 25, orsamentu ne’ebé atu sosa tratór bo’ot sira ne’e ha’u la lembra maibé menus hosi milliaun ida no tratór bo’ot ne’ebé ita sei hola ne’e kompleta ho ekipamentus balun”, Marcos da Cruz, hateten iha nia intervensaun serimónia despedida estudante AICAT 2023-2024 ne’ebé hala’o iha Salaun MAPPF Comoro, kinta ne’e.
Nia dehan, ho planu MAPPF nian, atu bele apoiu hodi loke tán área potensiál ne’ebé ke durante ne’e sei abandona hela.
“Ita atu aumenta produsaun liuhosi utilizasaun prátika argrikultór ho ekipamentu sira di’ak atu bele aumenta tán ita-nia produsaun”, nia adianta.
Iha biban ne’e mós Ministru Marcos hateten, kona-ba tratatór ne’ebé mak antes ne’e Governu anteriór distribui iha 2008, 2009 no 2010 Governu liuhosi Ministériu Agrikultura, Peskas, Pekuariu no Floresta IX Governu sei halo fali levantamentu ba tratór sira ne’e hodi hatene hira mak funsiona no hira mak avaria.
“Sim tratór sira ne’e ita sosa iha 2008, 2009 no 2010 no tratór mós tinan barak ona, tratór sira ne’e halo servisu no barak mak aat. Ita sei buka atu hadia, tanba ne’e ita sei buka halo levantamentu hodi haree fali ida ne’ebé mak labele ona atu hadia tanba kustu manutensaun liu fali nian folin, entaun ita haruka ba leilaun”, nia dehan.
“Ida ne’ebé ita sei bele hadia, ita sei tau osan para hadia atu fasilita servisu iha kampu”, nia konklui.
Jornalista: Natalino Costa
Editór : Zezito Silva
