DILI, 14 Abríl 2026 (TATOLI)—Ministériu Justisa (MJ) selebra kontratu serbisu ho empreza rua hanesan Mojes Enterprise Unipesoal no PT Sangkurian Ensijur husi Indonézia atu halo dezeñu ba estabelesimentu Sentru Koresionál Weberek, ne’ebé lokaliza iha Postu Administrativu Alas, Munisípiu Manufahi.
Kontratu ne’e asina husi Ministru Justisa, Sergio Hornai no reprezentante husi empreza ne’e rasik.
“Ohin ita asina akordu ida ou asina kontratu ida ho kompañia dezeñu ba Sentru Koresionál Weberek,” Ministru Justisa hato’o ba Jornalista sira hafoin asina akordu serbisu iha sala enkontru MJ, Kolmera.
Kontratatu serbisu ba implementasaun projetu durante fulan-neen to’o tinan-ida, ne’ebé empreza hahú halo serbisu husi loron asina kontratu to’o termina.
Orsamentu ba dezeñu estabelesimentu senrtu ne’e ho kustu $196.999,60 no estabelese iha terrenu ektare 100, ne’ebé antes ne’e pesoál husi MJ Terras Propriedade liberta ona.
Ministru dehan, planu ba estabesimentu sentru hahú kedan iha I Governu to’o IX Governu foin mak foin realiza liuhusi estudu no prosesu naruk hodi haree mós ba kondisaun prizaun tolu.
Governante ne’e esplika, estabelesimentu sentru ne’e ho objetivu prinsipál ida atu eleva koñesimentu reklusu sira-nia, liliu oinsá atu produtivu liután iha área formasaun vokasionál.
“Sentru ida-ne’e importante atu eleva ema sira ne’ebé hetan ona desizaun definitiva para sira halo atividade produtivu ruma iha fatin ida-ne’e. Ita halo atubele halo formasaun ba prizioneru, atu nune’e sira bele hasa’e abilidade no eleva koñesimentu iha formasaun vokasionál balun, nune’e bele forma sira la’o tuir dalan di’ak, kuandu sira reintegra ba sosiedade, sira iha koñesimentu foun,” Ministru esplika.
Notísia relevante : MJ no ADN hahú diskute dezeñu prizaun Weberek
Sentru Koresionál tama iha programa IX Governu konstitusionál atu orienta eleva prizioneru sira-nia koñesimentu.
“Hotu-hotu hein katak ho grasas Maromak nia buat hotu la’o di’ak atu sira bele prodús dezeñu di’ak atubele reprezenta ita-nia interrese hodi nune’e ba futuru bele konklui lori prosesu sira ba oin nune’e halo konstrusaun obra,” nia tenik.
Ministru dehan, Governu sei foti medida ruma tuir Lei Aprovizionamentu bainhira empreza la halo tuir kontratu, nune’e bele fó sansaun.
Iha fatin hanesan, Diretór ba empreza Mojes Enterprise Unipessoal.Lda, Acácio De Jesus hateten, kontratu ne’e hodi hahú ho survey fatin produsaun iha Weberek.
“Ami asina kontratulu, ami sei halo serbisu bazeia ba na’in nia hakarak, kontratu ida-ne’e nia serbisu prinsipál mak sei halo survey ba fatin, no ami sei halo estudu no dezeñu,”Acacio dehan.
Nune’e, Responsável Empreza komprometidu sei kumpre loron serbisu, maibé bainhira iha intervensaun husi li’ur mak sei halo koordenasaun.
“Entaun ami sei halo koordensaun ba na’in ba projetu, tanba dezafiu iha rua de’it, ida fatór externál, liliu mak kordensaun projeitu rasik sei inklina ho Ministériu Obra Publika, ADN (Ajénsia Dezenvolvimentu Nasionál), karik projeitu ne’e la’o mak liña koordensaun ladún di’ak bele interven ho tempu ne’ebé badak,” nia hato’o.
Fator daruak mak empreza mós sei halo revizaun ba dezeñu, haree ba pagamentu no administrasaun.
“Karik rua ne’e mak ami halo kooperasaun ho na’in ba projeitu ne’e ladun di’ak bele iha intervensaun iha tempu hanesan,” nia tenik.
Jornalista : Natalino Costa
Editora : Julia Chatarina
