DILI, 08 Abríl 2026 (TATOLI)—Ministériu Edukasaun (ME) daudaun ne’e kontinua utiliza livru husi Sentru Nasionál Chega, Institutu Públiku (CNC, I.P) sai konteúdu ba estudante sira aprende matéria istória no edukasaun sívika.
“I stória nasionál ita foti husi livru Chega. Entaun husi tinan 2014 no 2015 mai, matéria ne’ebé iha livru istória ba ensinu baziku ita foti kedan husi livru Chega,” Ministra Edukasaun, Dulce de Jesus Soares, hateten ba jornalista sira iha Vila-Verde, Kuarta ne’e.
ME kontinua serbisu hamutuk CNC hodi dezenvolve di’ak liután livru rekomendasaun Chega ba kurríkulu ensinu baziku.
Iha parte seluk, Diretór Edukasaun Formasaun iha CNC, Alexandre Ornai Pinto, fundamenta, CNC no ME daudadun ne’e dezenvolve matéria direitu umanu no violasaun umanu tama ona iha kurríkulu.
“Ba tinan-ne’e ami dezenvolve ona manuál ba 7⁰ no 8⁰ anu, no iha Fulan-Dezembru sei enkaixa mós manuál rekomendasaun Chega ba kurríkulu,” nia esplika.
Notísia relevante : Ministru Nelyo lansa livru Istória Domin
Aliende ne’e mós, CNC halo aprosimasaun ho ME atu halo revizaun ba kurríkulu ensinu sekundáriu tanba tuir CNC nia avaliasaun matéria istória iha erru uituan, tanba estudante sira aprezenta istória husi europa mak barak liu kompara ho istória Timor-Leste.
“Ita tenke enkaixa istória Timor barak liu iha kurríkulu. Tanba ita lakohi estudante sira apreende de’it akontese iha sá loron, iha ne’ebé, sé mak envolve. Maibé ita hakarak sira iha kapasidade atu kestiona tanbasá no oinsá mak akontese, ha’u fó ezemplu ema hotu hatene Masakre 12 Novemberu, maibé la hatene tanbasá joven sira halo asaun ne’e. Entaun ita hakarak haree mak ida espesifiku hanesan ne’e,” Hornai subliña.
Tanba ne’e, CNC husu ba ME atu aprezenta istória ho sistematiku liu ba estudante sira la’ós aprende de’it loron no fatin akontesimu.
“Ami sei avansa ba avaliasaun kurríkulu ensinu sekundáriu. Ami la’ós halo avaliasaun atu identifika matéria, maibé ami tenta halo esbosu kurríkulu ida, nune’e sei submete ba Ministériu Edukasaun, atu ita haree matéria saida mak ita iha hodi halo aliñamentu ho ensinu superiór, atu ita propoin saida mak estudante sira aprende iha terseiru siklu, ensinu sekundáriu, nune’e ba ensinu superiór sira aprofunda de’it ona,” nia katak.
Jornalista : Osória Marques
Editora : Julia Chatarina
