DILI, 11 Outubru 2025 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, Sábadu ne’e, lansa livru rua husi eskritór Felismino Soriano da Costa ho títulu ‘Ita-Nia Istória Domin, no Fuan Nia Lian’.
“Livru rua ne’ebé ohin halo lansamentu ne’e iha ligasaun ba malu. Livru kona-ba ‘Ita-Nia Istória Domin’ ida-ne’e hanoin ema hotu iha istória domin entaun liafuan sira-ne’ebé ha’u hakerek iha livru ne’e ha’u-nia peregrinasaun domin nian ne’ebé ha’u enfrenta iha mundu. Ida-ne’e hanesan istória ida bainhira ha’u lakon iha mundu ne’e karik husik hela hanesan esperiénsia ida ba ema seluk,” Felismino hateten iha lansamentu livru, iha estúdiu Televizaun Edukasaun Timor (TVE-T), Raikotu, Dili.
TATOLI/ Arminda Fonseca
Nia haktuir, livru ‘Ita-Nia Istória Domin’ ne’e rasik kompila istória domin hamutuk 24 ho nia pájina 107. Livru ne’e rasik hakerek kona-ba domin ho konteúdu oioin, hanesan domin ne’ebé lori ksolok, tanis, laran-susar no domin lori ba família, kolega, inan-aman no seluk tan.
“Razaun ha’u hili títulu ‘Ita-Nia Istória Domin’ tanba istória ida laiha ema ida mesak halo istória maibé hahú husi ema na’in-rua no ema barak no husi istória domin 24 ne’e la’ós ha’u mesak de’it maibé iha ema lubuk ida mak sai na’in ba istória sira-ne’e,” Felismino informa.
Nia hatutan prosesu hakerek livru rua ne’e hahú husi nia gosta lee barak no inspira husi nia inan bainhira sei ki’ik sempre hola livru fó sira lee.
“Livru sira-ne’ebé lansa ne’e hakerek hahú husi 2019 bainhira hala’o nia formasaun apostulante iha Flores no Malázia iha tinan ne’ebé akontese Covid-19 ne’ebé sulan hela de’it entaun hahú lee barak hamosu ideia hakerek livru,” eskritór ne’e esplika.
Kona-ba livru daruak ho títulu ‘Fuan Nia Lian’ ida-ne’e kompila fali poezia no dadolin hamutuk 62 ho pájina 77. Razaun foti títulu refere tanba poezia sira-ne’e hato’o liafuan krítika, domin, emosionál, sentimentu sira, no livru ne’e halo rezumu badak fali husi livru ‘Ita Nia Istória Domin’.
Iha fatin hanesan, Ministru Juventude, Desportu, Arte no Kultura, Nelyo Isaac Sarmento agradese ba eskritór Felismino Soriano da Costa ne’ebé ho inisiativa hakerek livru referidu.
“Ha’u hakarak hato’o agradese tebes ba Felismino Soriano da Costa tanba nu’udár foin-sa’e ne’ebé ho nia inisiativa hakerek livru, tanba atu kontribui ba dezenvolvimentu nasaun liuhusi mós kontribui ideia liuhusi livru sira, nune’e husu bá-oin kontinua hakerek. Labele baruk,” nia dehan.
Tuir nia, mundu ohin loron buat hotu mosu iha mídia sosiál halo ema barak mak uza mídia sosiál maibé bainhira utiliza la kuidadu mak sai fali vítima ba mídia sosiál. Ezemplu ne’ebé Felismino Soriano da Costa halo ida-ne’e di’ak atu motiva joven sira labele depende de’it ba mídia sosiál maibé presiza aprende no halo mudansa ruma.
“Ha’u husu ba foin-sa’e sira buka buat ne’ebé pozitivu husi mídia sosiál hodi aplika iha moris, lae ita mak sai fali vítima ba mídia sosiál,” nia husu.
Aleinde ne’e, Diretór TVE-T, Armindo Caetano agredese tebes tanba hili TVE-T sai fatin hodi lansa livru ne’e. Ida-ne’e fó hanoin katak domin la’ós husi liafuan de’it maibé oinsá presiza sakrifísiu, fiel, luta hodi hetan finalidade.
“Livru ida-ne’e fó hanoin mai ita katak domin mak halo ema hamutuk. Maski maihusi fatin oioin ka diferente maibé domin sai ponte halo ema hamutuk, kria fraternidade no seluk tan. Domin mak hatudu ita-nia luta moris. Dalaruma ita sente iha limitasaun maibé domin halo ita forte. Domin ne’e iha valór espirituál lori ita ba Maromak no domin hatudu ita-nia identidade rasik,” nia konklui.
Serimónia lansamentu livru ne’e partisipa husi família, kolega, estudante sira inklui eskritór sira hanesan Cancio Ximenes Soares “Cassimata” no seluk tan.
Jornalista: Arminda Fonseca
Editór: Xisto Freitas da Piedade
