DILI, 14 Abríl 2026 (TATOLI)–Vise Primeiru-Ministru (PM) no Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hateten, Governu kontinua halo esforsu atu asegura projetu Uma Dignu la’o tuir prosedimentu ne’ebé loos, tanba ne’e husu kompañia responsável projetu sira atu muda disiplina serbisu.
“Ha’u sempre orienta kompañia Timor sira atu muda disiplina serbisu, hahú husi dadeer to’o meudia no kontinua to’o kalan atu aselera konstrusaun ne’e. Agora kona-ba atrazu iha projetu balun, hatudu katak problema sira barak maihusi kompañia sira-nia situasaun finanseira, liuliu sira-ne’ebé iha deve iha banku,” Vise PM Assanami hato’o ba Jornalista sira, iha salaun Três de Março Maubai, Komoro, Tersa ne’e.
Ministru dehan, prosesu pagamentu la’o hela maibé falta osan no dezafiu prinsipál maka iha nível terrenu.
Aleinde ne’e, buat hotu hanesan dezeñu no Bill of Quantity (BoQ) tenke liuhusi aprovasaun Ajénsia Dezenvolvimentu Nasionál (ADN) molok ba konkursu.
“To’o agora laiha irregularidade séria ida,” Vise-PM Assanami reforsa.
Nota mós katak, dalaruma osan ne’ebé Governu selu ba kompañia, sira uza hodi selu deve iha banku, la’ós kontinua konstrusaun.
Notísia relevante : Projetu Uma Dignu balun iha Muapitine seidauk finaliza, Parlamentu husu medida rigór
Maski nune’e, governante ne’e asegura katak maioria projetu kontinua la’o ona hanesan Uatubeliu ne’ebé progresu to’o ona 95%, nune’e espera bele inaugura molok tama iha tinan klaran ne’e. Nune’e mós, konstrusaun Uma Dignu iha área Tunu Bibi Maliana, Fatubeliu, Natarbora no Muapitine Lautein nian.
Vise PM dehan, rekezitu pagamentu ba kompañia depende ba ADN nia verifikasaun no labele transfere osan bainhira serbisu seidauk ramata.
“Ne’e regra ne’ebé tenke tuir hodi asegura kualidade no transparénsia. Projetu ne’e laiha intervensaun polítika, la’ós fó ba malu de’it,” nia afirma.
Governante ne’e nafatin prefere fó oportunidade ba kompañia timoroan, maibé mós sei loke dalan ba kompañia estranjeiru atu asegura kompetisaun no hasa’e kualidade serbisu, liuliu iha kontestu integrasaun rejionál hanesan Asosiasaun Nasaun Sudeste Aziátiku (ASEAN, sigla ingléz).
Implementasaun projetu Uma Dignu faze dahuluk iha tinan 2024 hamutuk unidade 90, ho totál osamentu $4.050.000, ne’ebé kustu kada uma $45.000.
Jornalista : Osória Marques
Editora : Julia Chatarina
