DILI, 05 fevereiru 2025 (TATOLI)—Ministru Justisa, Sergio de Jesus Fernandes da Costa Hornai, hateten Ministériu Justisa (MJ) iha segunda (27/1), hala’o ona enkontru koordenasaun ho parte Ajénsia Dezenvolvimentu Nasionál (ADN) inklui Komisaun Nasionál Aprovizionamentu (CAN-sigla portuges), diskute dezeñu konstrusaun prizaun boot ne’ebé sei harii iha aldeia Weberek, suku Dotik, Postu Administrativu Alas, munisípiu Manufahi.
“Semana ida kotuk ita halo koordenasaun ne’ebé metin loos ho Ajénsia Dezenvolvimentu Nasionál, nune’e mós Komisaun Nasionál Aprovizionamentu oinsá mak atu buat sira-ne’e iha koordenasaun téknika hodi halo duni ho urjentemente,” Sergio Hornai ba Tatoli iha nia kna’ar fatin, Colmera, kuarta ne’e.
Governante ne’e rekoñese katak prizaun Becora, Gleno no Suai over capacity ona, tanba ne’e tempu ona Governu konstitui fali prizaun boot iha Weberek atu akomula dadur sira iha fatin referida.
Notísia relevante: 2023, MJ prevee orsamentu konstrui prizaun iha Manufahi
“Ita rekoñese katak espasu prizaun tolu ultrapasa ona kapasidade akomula rekluzu. Tanba ne’e, Governu konstrui fali prizaun boot ida iha Weberek para bele lori ita-nia kondendu sira bá fali iha ne’ebá, iha-ne’ebé aleinde sira kumpre pena, sira mós halo atividade ida eduka sira-nia mentál hodi halo buat ne’ebé pozitivu,” nia konklui.
Antes ne’e, iha VIII Governu Konstitusionál nia tempu, Ministru Justisa, Tiago Amaral Sarmento, iha Orsamentu Jerál Estadu 2023 hahú prevee orsamentu hodi konstrui prizaun referida.
“Ita sei kontrui prizaun boot iha aldeia Weberek, suku Dotik, postu administrativu Alas, Munisipiu Manufahi. Planu ida-ne’e ita sei orsamenta iha Orsamentu Jerál Estadu (OJE) 2023,” Ministru Justisa hateten.
Estatutu rai ne’ebé atu konstrui prizaun ne’e balun rai Estadu no balun rai privadu ne’ebé komunidade Weberek rasik mak oferese ona ba Ministériu Justisa ho gratuitamente hamutuk ektare 100.
Tuir dezeñu no Bill of Quantity (BoQ), kustu ba prizaun ne’e hamutuk millaun $200.
Jornalista: Natalino Costa
Editór: Xisto Freitas da Piedade
