DILI, 12 Abríl 2026 (TATOLI)—Fisheries Liaison Officer ka Ofisiál Ligasaun ho Peska husi Empreza ENI, Galiano Waidau, haktuir, durante halo serbisu peskiza iha tasi, konsege hetan ró hitu husi Indonézia halo peska ilegál iha Tasi Timor, iha área Vikeke.
“Ami hamutuk ró lima mak halo survey (peskiza) ba mina, no ró ilegál ne’ebé ami hasoru ne’e hamutuk hitu ona, barak liuhusi Indonézia tamba peskadór hirak ne’e atu atraka mai fatin ne’ebé ami survey ba ne’e. Ró hirak ne’e halo atividade peska ilegál de’it, laiha atividade seluk hanesan transasaun mina ilegál ka fa’an sasán ilegál ne’e laiha,” Galiano Waidau, informa ba Ajénsia TATOLI, via telefónika, Domingu ne’e.
Galiano Waidau hamutuk ho nia ekipa la’ós serbisu iha Seguransa Marrítima, maibé serbisu tuir ró sira ne’ebé mak mai halo peskiza iha Tasi Timor besik Vikeke.
“Ami halo hela survey ba mina ne’ebé atu halo perfurasaun foun,” nia akresenta.
Notísia relevante : Janeiru to’o Fevereiru, AMN deteta ró peska ilegál 50 sirkula iha Tasi Timor
Ofisiál ne’e haktuir, durante semana ida ona, área hirak ne’ebé sira halo peskiza sempre hetan ró husi Indonézia ne’ebé halo pesak ilegál. Tanba ne’e bainhira nia hetan ró peska ilegál sira, nia diretamente informa liuhusi nia konta Facebook.
Biban ne’e, Ofisiál ne’e husu ba parte kompetente sira hanesan Autoridade Nasionál Marrítima (ANM) no Unidade Polísia Marrítima (UPM) atu haree no halo kontrolu másimu ba rikusoin tasi-laran.
“Ita-nia rekursu tasi di’ak, entaun ema seluk gosta mai foti subar. Ha’u la hatene, ita-nia seguransa sira ne’e falta ekipamentu ka oinsá, tamba peskadór sira ne’e husi Indonézia mai dook, maibé tambasá ita-nia besik hanesan ne’e lakohi mai halo kontrolu iha ita-nia tasi,” nia katak.
To’o informasaun ne’e públika, Ajénsia TATOLI seidauk hetan resposta husi ANM no Entidade relevante seluk.
Jornalista : Alexandra da Costa
Editora : Julia Chatarina
