DILI, 09 Marsu 2026 (TATOLI)—Militár Komponente Navál konsege deteta no hapara ró peska ilegál hamutuk 50 ne’ebé sirkula iha área Tasi Timor.
“Ekipa deteta liuhusi analiza ne’ebé sira iha, liuhusi satelite ne’ebé iha,” Diretór Autoridade Marritima Nasionál (AMN) no Komandante Komponente Navál, Komodoro Higino das Neves , informa ba Jornalista sira hafoin halo abertura kursu Maritime Domain Awareness (MDA) Analytical Training hodi halo analiza kle’an deteta ró sira ne’ebé sirkula iha Tasi Timor, ne’ebé hala’o iha Novo Turismo, Segunda ne’e.
Ekipa utiliza ekipamentu oinoin hodi bele deteta atividade sira iha tasi laran tanba to’o agora seidauk iha ró ne’ebé iha kapasidade no kualidade hodi bele hapara ró ne’ebé hala’o atividade ilegál iha Tasi Timor.
“Problema ne’ebé ita enfrenta mak meius, buat hotu-hotu prontu hotu ona, agora falta meius para bele ajuda Komponente Navál halo ninia misaun, liuliu bele redús atividade ilegál iha tasi,” nia akresenta.
Notísia relevante : Delimitasaun fronteira marítima sei fó kontribuisaun ba komabate peska ilegál
Nia dehan, hanesan Komandu Operasionál, meius hotu-hotu halo maibé kona-ba apoiu ró ne’e hanesan desizaun polítika, enkuantu Ministru Defeza deside ona katak sei fó ró ida iha tempu badak.
“Ró rua ba Jaco no Betano, seluk iha Portu Dili, sira husi Ministériu Defeza apoiu halo ona inspesaun no sei halo manutensaun iha Fulan-Abril tinan oin. Ita fiar sei akontese para depois atividade Komponente Navál la’o. Durante ne’e ami halo, bainhira ró laiha ami koloka largu boot sira ne’ebé ita iha tasi ninin para ajuda povu keta mout karik, ita salva lalais,” nia katak.
Aleinde ne’e, ANM hasoru problema laiha ró ho kapasidade di’ak hodi hala’o atividade Komponente Navál, hanesan atu hapara atividade peska ilegál no trans-nasionál sira ne’ebé hala’o iha Timor.
Ró ne’ebé rejistu no autorizadu iha Timor, ne’ebé navega kada loron hamutuk ualu, enkuantu ró 200-resin baibain halo atividade peska iha Tasi Timor.
“Durante tinan-ida nia laran, esforsu husi Militár Komponente Navál husi Sentru Operasaun Marrítima mak konsege deteta no hapara ró hamutuk 50-resin, ne’ebé sirkula iha Tasi hodi halo atividade ilegál, naok riku soin tasi nian, hanesan ikan no seluk tan,” Komodoro Higino das Neves, relata.
Nia konta tuir, durante tinan 2025, ró ne’ebé sirkula iha Tasi Timor besik 1.000 maibé barak liu lori mina tanke no kontainer ho sasán sira.
“Maibé ró peska ilegál iha tinan ida-ne’e ita deteta 50 ne’ebé mak sirkula iha ita-nia tasi parte súl. Ida-ne’e mak sentru operasaun marrítima iha Hera deteta ró hirak ne’e,” nia tenik.
Jornalista : Natalino Costa
Editora : Julia Chatarina
