Delimitasaun fronteira marítima sei fó kontribuisaun ba komabate peska ilegál
DILI, 05 Novembru 2025 (TATOLI)—Delimitasaun fonteira marítima ne’ebé Governu Timor-Leste ho Indonézia halo sei fó kontribuisaun ba vizaun dezenvolvimentu Timor-Leste no kombate peska ilegál.
Notísia Relevante: TL ho Indonézia finaliza delimitasaun fronteira terrestre iha tinan ne’e
Primeiru-Ministru, Kay Rala Xanana Gusmão, hateten luta nasionál ba soberania iha fronteira marítims, tau mós iha konsiderasaun ba kestaun dezenvolvimentu ekonómiku ho protesaun ambientál.
“Nune’e, delimitasaun fronteira marítima ita konsege halo ona ho Austrália, no esforsus sira ne’ebé halo ba delimitasaun fronteiras ho Indonésia, significa ita bele hetan direitus tomak ba ita-nia fundu marinu inklui direitus ba explorasaun petróleo no gás,” Primeiru-Ministru, Kay Rala Xanana Gusmão, hateten iha diskursu debate OJE 2026 iha faze jeneralidade iha PN, ohin.
Nune’e mós, nia dehan, iha Zona Ekonómika Esklusiva (ZEE) ne’e define kona-ba direitu atu halo peska iha tasi laran hanesan dezenvolvimentu setór marítimu-turístiku.
“Tanba ne’e mak ho ksolok boot tebes, ha’u informa katak tinan ne’e ita hahú hikas ona negosiasaun kona-ba fronteira marítima ho Indonézia, tanba antes ne’e ita realiza ona ronda dahuluk iha Dili iha fulan-Agostu liubá, no fulan oin, sei realiza ronda daruak ba negosiasaun fronteira marítima iha Indonézia,” Xefe Governu ne’e informa.
Normalmente, nia dehan, vantajen husi delimitasaun fronteira marítima ho Indonézia, klaru sei kontribui ba vizaun kona-ba dezenvolvimentu, inklui kombate ba peska ilegál ne’ebé la deklarada no laiha regulamentada bele prejudika maka’as ba kofre Estadu ho ambiente marinu.
Enkuantu tuir delimitasaun ronda daruak ba negosiasaun fronteira marítima entre Timor-Leste ho Indonézia, sei hala’o iha loron 08-10 fulan-Dezembru 2025, iha Indonézia.
Notísia Relevante: PN Sei Altera Lei Lima Hafoin Halo Ratifikasaun Ba Tratadu Delimitasaun Fronteira Marítima
Jornalista : Alexandra da Costa
Editór : Cancio Ximenes
