DILI, 09 Abríl 2026 (TATOLI)–Governu liuhusi Sekretaria Estadu Asuntu Toponímia no Organizasaun Urbana (SEATOU) hamutuk Ministériu Obra Públika (MOP), Kinta ne’e, kontinua hasai uma haat iha área Bairru-Pité, ne’ebé ba oin sei halo alargamentu.
Sekretáriu Estadu Asuntu Toponímia no Organizasaun Urbana, Germano Santa Brites, informa atividade ne’e hanesan kontinuasaun husi tinan kotuk, bainhira ekipa konjunta sobu husi parte Aitarak-laran nian mai Palásiu Prezidente nia sorin.
“Polísia balun hela iha ne’e, sira mós prontu koopera, fó uluk sira-nia fatin para sobu rasik nomós komunidade seluk iha laran ne’e hasai rasik sira-nia sasán,” Sekretáriu Estadu Germano hato’o iha Bairru-Pité.
Notísia relevante : Ekipa konjunta planeia fulan-ne’e halo despeju administrativu iha Bidau Masau no Akadiru-hun
Nune’e mós, Xefe Gabinete MOP, Cristovão Fausto Guterres, hateten, área ne’e presiza loke tan atu evita engarafamentu.
“MOP no parte Terra no Propriedade hasai ona dadus no identifika iha uma-kain haat mak afeta loke estrada foun ida-ne’e. Kuaze ita-nia verifikasaun ramata ona hanesan parte ministériu hateten katak, serbisu agora ne’e ekipa kada edisaun ida elabora ona dadus hotu, espera iha tempu badak komunidade bele hetan sira-nia diretu,” nia akresenta.
Enkuantu, hahú husi Aitarak-laran to’o iha ne’e kuaze metru 400 no nia luan metru 12. Nune’e, prosesu serbisu iha terrenu ho durasaun fulan-neen, ne’e lalais liu fulan-ualu.
Jornalista : Osória Marques
Editora : Julia Chatarina
