Ekipa konjunta planeia fulan-ne’e halo despeju administrativu iha Bidau Masau no Akadiru-hun
DILI, 08 Abríl 2026 (TATOLI)—Ekipa konjunta kompostu hosi Sekretaria Estadu Asuntu Toponímia Organizasaun Urbana (SEATOU), Ministériu Obra Públika (MOP), Sekretáriu Estadu Terra no Propriedade, Sekretaria Estadu Arte no Kultura (SEAK), no Sekretaria Estadu Floresta (SEF) planeia ona iha Fulan-Abríl sei halo despeju administrativu ba uma-kain balun iha Bidau Masau no Akadiru-hun.
“Agora ita halo urjente hodi prepara, hahú husi ha’u-nia Aldeia Bidau Masau, depoiz tama bá Ospitál Nasionál Guido Valadares (HNGV), kontinua ba Akadiru-hun karuk ho loos. Nune’e, husi Katedral nian to’o Mandarin no husi Mandarin to’o Estátua Nicolau Lobato, Komoro nian. Iha fulan ida-ne’e nia laran sei tau markasaun hotu. Ida-ne’ebé mak tau ona markasaun ekipa konjunta sei foti dadus,” Sekretáriu Estadu Asuntu Toponímia Organizasaun Urbana, Germano Santa Dias, informa iha Sede Suku Manleuana, Postu Administrativu Dom Aleixo, Munisípiu Dili, Kuarta ne’e.
Notísia relevante : Ekipa SEATOU halo despeju administrativu ba uma kain rua iha Bidau
Governante ne’e dehan, husi terminál Bekora sa’e to’o bá leten iha estrada kurva bee-tanke nian ne’e iha uma barak, maibé iha leten ne’e uma la to’o 10. Tanba ne’e, ekipa SEATOU ho parte Terra no Arte Kultura mós bá haree ona no kada ministériu tuir nia serbisu.
Sekretáriu Estadu haktuir, komunidade ne’ebé uma hetan ona markasaun iha Ministériu Finansa nia kotuk ne’e konsege halo impedimentu, tanba ne’e kompañia seidauk halo barreira.
“Maibé iha semana ne’e, ekipa MOP sei ba halo identifikasaun no karik iha lakuna balun mak halai laloos ita sei ba haloos tiha. Ida-ne’e presiza halo tanba tau ona markasaun iha ne’ebá,” nia esplika.
Ekipa konjunta sei hahú husi Ponte BJ Habibie Bidau Santa-Ana nian bá HNGV, hafoin bá mota ninin Bidau Masaur to’o rate. Nune’e, mota ninin sorin-sorin óleu pezadu iha Kamea to’o Bedois. Aleinde ne’e, sei kontinua ba Bekusi tama bá laran husi mota nian to’o mota-ulun.
Nune’e, nia apela ba komunidade ne’ebé hela iha fatin ne’ebe temi ona atu prepara-an no kolabora hodi kontribui dadus ba ekipa téknika sira hodi halo preparasaun ba administrasaun.
Jornalista : Osória Marques
Editora : Julia Chatarina
