DILI, 08 jullu 2024 (TATOLI)—Ekipa konjunta Sekretária Estadu Asuntu Toponímia no Organizasaun Urbana (SEATOU), segunda neé, hala’o atividade despeju administrativu ba uma kain rua iha semitériu oin iha suku Bidau Santana, postu administrativu Cristo Rei, munisípiu Dili.
Familia husi uma kain rua ne’ e, Governu fó ona avizu no notifikasaun kle’ur ona hodi bele buka fatin no bele muda ba fatin seluk.
“Ohin ne’e atividade despeju administrativu ba uma kain rua ne’e. Tuir lolos ne’e, hasai iha fulan hirak liuba, maibé fo hela tempu ba moradora maibé sira la uza tuir dalan. Ita mai ko’alia hela de’it husi Ofisiál Polisia Suku (OPS) no Ministériu Solidariedade Sosiál mai hela ne’e mós lakohi koopera,” Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hateten ba jornalista sira, iha Bidau Santana.
Governante ne’e hateten, iha semana kotuk Governu fó tan avizu hodi bele hasai no muda fatin sira-ne’ebé sira buka hodi hela ba.
“Di’ak-liu prepara aan, ohin iha segunda-feira ne’e, muda fatin di’ak atu Ministériu Obra Públika halo nia servisu. Ami mai sira koopera hodi hasa’e sira-nia sasán ba karreta iha MSSI nian hodi ba fatin ne’ebé nia hatudu ba,” nia dehan.
Ba oin, nia dehan, Ministériu Obra Públika hadi’a ona dalan no normaliza fatin ba iha rate ne’e.
Tuir nia, despeju administrativu ne’e mós atu fó paisajen di’ak ba iha turista sira-ne’ebé atu mai vizita fatin istóriku no sítiu turizmu relizioju Cristu Rei iha Fatucama.
“Ida-ne’e estrada boot ba Cristo Rei no ema hotu-hotu tenke liuhusi fatin ne’e. Ida-ne’e atu halo fatin parkir ka patajen hodi família sira bele mai vizita defuntu,” nia hateten.
Iha fatin hanesan, moradór Abrão Santos, hateten nia parte hetan notifikasaun husi Governu, tanba ne’e nia mós kontribui hodi sai husi fatin ne’e.
“Sira fó notifikasaun kle’ur ona ne’e mak mai sobu ne’e. Ita tenke simu, tanba polítika Governu nian atu hadia sidade Dili,” nai dehan.
Jornalista : Jesuína Xavier
Editór : Cancio Ximenes
