DILI, 11 setembru 2023 (TATOLI) – Xefe Estadu José Ramos Horta fó posse ba membru Konsellu Estadu no Konsellu Superiór Defeza no Seguransa iha Palásiu Prezidensiál, segunda ne’e.
“Konsellu Estadu hanesan orgaun konsultivu Prezidente Repúblika nian ba asuntu polítiku, bazeia ba Konstituisaun RDTL artigu 90 no 91 no Konsellu Superiór Defeza no Seguransa hanesan orgaun konsultivu Prezidente Repúblika nian ba asuntu defeza, seguransa no soberania, bazeia ba Konstituisaun RDTL artigu 48”, tenik iha komunikadu Prezidente Repúblika nian ne’ebé Agência TATOLI asesu.
Membru foun Konsellu Estadu hamutuk ema 14 mak Prezidente Parlamentu Nasionál, Maria Fernanda Lay, Primeiru-Ministru, Kay Rala Xanana Gusmão, Eis Prezidente Repúblika, Major-Jenerál Taur Matan Ruak no Es Prezidente Repúblika, Francisco Guterres Lú Olo.
Membru na’in-lima nomeadu hosi Prezidente Repúblika mak Abilio da Conceição de Araujo, Maria Domingas Fernandes Alves, Tenente-Jeneral Tito da Costa Cristovão Lere Anan Timur Madre Guilhermina Marçal no Milena Pires.
Nune’e, Membru na’in-lima seluk nomeadu hosi Parlamentu Nasionál mak Virgilio Smith, Jacinto Viegas Vicente, Numinando S. Martins, Ricardo da Costa Ribeiro no Josefa Alves Pereira Soares.
Membru foun ba Konsellu Superiór Defeza no Seguransa hamutuk 13 mak hanesan Primeiru-Ministru, Kay Rala Xanana Gusmão, Ministru Negósiu Estranjeiru no Kooperasaun, Bendito dos Santos Freitas, Ministru Defeza, Contra-Almirante Donaciano do Rosário Gomes, Ministru Interiór, Francisco da Costa Guterres, Ministru Justisa, Amândio de Sá Benevides, Reprezentante Parlamentu Nasionál Deputada Maria Terezinha da Silva Viegas, Deputadu David Mandati Dias Ximenes no Deputadu Duarte Nunes, Xefe Estado Maior Generál das F-FDTL, Tenente-Jeneral Falur Rate Laek, Komandante Jerál PNTL, Komisáriu Jerál Henrique da Costa, Diretór Jerál Servisu Nasionál Intelijénsia, Longuinhos Monteiro, Júlio Tomás Pinto no Nuno Manuel Corvelo de Andrade Sarmento (Nomeadu husi Prezidente Repúblika).
Reuniaun Konsellu Estadu no Konsellu Superiór Defeza no Seguransa prezide husi Prezidente Repúblika.
Hafoin fó pose ba membru foun sira, Prezidente Repúblika kontinua kedas ho lidera reuniaun ba dahuluk hamutuk ho Membru konsellu rua hodi ko’alia kona-ba funsaun membru sira-nian bazeia ba lei no rejimentu.
Membru Konsellu Estadu hamutuk na’in sanulu resin haat no Konsellu Superior Defeza no Seguransa hamutuk na’in sanulu resin tolu sei hala’o sira-nia mandatu durante tinan lima.
Jornalista: Hotencio Sanchez
Editór : Zezito Silva
